​​Буянта хэрэг бүгэдөөрөө дэмжэе

Андрей Дондукбаевай гэрэл зураг

Бүгэдэ буряадуудые бултыень нэгэдүүлһэн, хамаг зоной ажамидаралай ерээдүйе аршалһан субаргануудай барилгын ажал түлэг дундаа ябуулагдажа байна.

Ородой Холбоото Уласай Буддын шажанай заншалта Сангхын, Агын дасанай санаартанай болон Буряад Уласай Засагай газарай дэмжэлтээр байгуулагдаһан бүгэдэ Буряадай эмхидхэлэй хорооной аша оролдолгоор “Алханын найман субарга” барилгын, мүн Далай ламын субарга һэльбэн шэнэлэлгын ажал мүнөөдэрэй байдалаар яһала урагшатай бүтээгдэжэ эхилээ.

Майн һарын арбан юһэндэ Улаан-Үдэ хотодо тус хэмжээ ябуулгада зорюулагдаһан нигүүлэсхы сэдьхэлэй марафон үнгэргэгдөө бэлэй. Эндэһээ буянта хэрэгэй эхин һуури табигдажа, Агын дасанай санаартанай хабаадалгатайгаар июниин юһэнэй үдэр Алханада бумба нюугдаба гээд уншагшадтаа дуулгая.

Нангин шүтөөнэй Алхана уулын бооридо субаргануудай һубарин бодхоогдохо хэрэгтэ гарта һабартаараа оролсожо, хүн бүхэн хубитаяа оруулалсаха аргатай бшуу. Жиндагуудай оруулһан хандибай хүсөөр ажал ябуулагдажа эхилэнхэй. Саашадаа Буряад ороной бүхы шахуу аймагуудһаа мүнгэн туһаламжа оруулагдахаар хүлеэгдэнэ. “Мүнгэ татабариин ажал нэгэ бага түргэдүүлжэ, зулгы һайхан зунай сагта барилгаяа хэжэ үрдибэл, хэн хэндэ һайн байгаа”, - гээд, энэ түсэлэй урагшатай бэелүүлэгдэхын түлөө аша оролдолго гаргаһан, удамарша бэрхэ Дынсыма Дышенова һанаата болоно.

Найман субаргын бодхоогдохо газартань шорой нягтаруулан жэгдэлэгдэжэ, һуури табигдахаяа түхеэрэгдэжэ байна. “Субаргын шүндэ найман Ганжуур, Алтан гэрэл, Сүнды, Жадамба номууд Түбэдһөө асарагдаа” - гээд, Агын дасанай шэрээтэ Бадма лама хөөрэнэ.

Найман субарга бодхоолгодо һайн дураараа хамһалсаха, барилгыень өөр дээрээ даажа абаһан эмхинүүд бии. Тодорхойлон хэлэхэдэ, Агын тойрогой захиргаан, Шэнэхээнэй буряадуудай нэгэдэл ба тиихэдэ Алхана нютагайхид нэгэ нэгэ субарга барилга ээм мүр дээрэ даажа абаһан байна. Бэшэ табан субаргань Буряад уласай аймагуудта хубаарилан даалгагдаһан юм.

“Энэ дэмбэрэлтэ хэрэгтэ үгэеэ нэгэдэн, “Би гэһэн гансаараа, бидэ гэһэн хамтаараа” гэһэн оньһон үгын удхаар бүгэдөөрө нэгэ амин боложо, буян үйлэдэел. Ерээдүй сагта бултанайнгаа түлөө эхэ байгаалияа хамгаалан, дайн дажарһаа, ган гасуур, түймэрэй осол аюулһаа болоод үер таляанһаа аршалжа байха нютаг нугынгаа, хада уулынгаа сахюусадта һүгэдэн мүргэжэ байхамнай болтогой” – гэжэ Дынсыма Цыбегмитовна олондо хандаха байна.

Агын дасанай контородо жиндагуудай хандиб ороһоор зандаа. Саарһан дээрэ гэр бүлынгөө гэшүүдэй нэрэнүүдыень бэшэжэ, үргэлэй мүнгэ оруулхада болоно. Тэрэ бэшэлгэнүүдтэй саарһан булта дансалагдажа, уһа, хии орохогүйгөөр бүтүүлэгдэжэ, субаргын шүндэ оруулагдаха юм.

Дынсыма Цыбикмитовна Дышенова - Мухар-Шэбэр аймагай Харгааһата нютагта тоонтотой, өөрөө эмшэн мэргэжэлтэй, Улаан-Үдэ Железнодорожно районой больницын неврологиин таһагые даагшаар хүдэлдэг юм. Бүри бага балшар наһанһаа шажан бурханай номуудые уншадаг, үнэнхэ зүрхэнһөө шүтэн зальбардаг эжынгээ хажууда үндын хүдэржэһэн басаган энэ холын хараатай, хамаг зоной ерээдүйн түлөө гүн сэдьхэлһээ оролдожо ябаһан зоной нэгэн болоно. 

Хандиб оруулха дуратайшуул энэ хаягаар эльгээхэдэ болоно:

Агинский дацан “Дэчен Лхундублинг”

ИНН 8001003810

КПП 80010101001

ОГРН/ОГРНИП 1028002320532

Расчетный счёт 40703.810.4.74000000336

БИК 047601637

Банк Читинское отделение №8600 ПАО СБЕРБАНК

Корр.счёт 30101.810.5.00000000637

Мобильный банк 89143513372 Дондукбаев Андрей Лупсандашиевич