838
Байгша оной июниин 30-һаа эхилээд, Байгал далайгаар хүн зониие шэрэһэн теплоход ажаллана. Байгал далайн хоёр эрьенүүдые ниилүүлгын уһанай харгы Кабанск аймагай Танхой тосхонһоо Эрхүү можын Листвянка хүрэтэр татагдаха. Энэ эгээл богони уһа гаталһан харгы болоно.
Июниин 30-да, иимэ рейсэй эхин табигдаа. Байгша оной августын 25-да “уһанай харгы” хаагдаха. Суббото бүхэндэ энэ рейс хэрэглэжэ болохо. Биледэй сэн 1500 түхэригэй. 5 наһа гүйсөөдүй үхибүүдые һуури газаргүйгөөр, миинтээр дахуулха арга үгтэнэ. Нэгэ часай туршада пароход 42 километр ябаха.
Үшөө нэгэ гайхамшагта зунай үйлэ хэрэг – түрүүшын пассажирска рейс “Турка-Ольхон ольтирог”. Июлиин 4-дэ, 12 хүниие шэрээд, энэ маршрут ажалаа эхилнэ. Иимэ ябалганда августын 30 болотор хабаадажа болоно.
Энэ "уһанай харгыгаар" теплоход четверг бүхэндэ 7:00 сагта буряад талаһаа, һөөргөө – средада, 15:00 сагта ябаха гээд тэмдэглэлтэй. Далайн уһан 6-7 сагай туршада гаталагдаха. Бүдүүн зоной биледэй сэн 3500 түхэригтэ, хүүгэдэй (5 наһанһаа 10-тай болотор) – 1750 түхэригтэ, 4 наһа хүрөөдүй хүүгэдтэ мүнгэ түлэлтэгүй, миинтэ.
Буряад Уласта Байгал далайн уһаар хүн зониие шэрэхэ аяншалгын талаар уласай түсэб бэелүүлэгдэнэ. Энэ данса Эрхүү можын, Буряад Уласай засагай газарнуудай, олзо эрхилэгшэдэй байгуулгануудай түлөөлэгшэдһөө бүридэһэн ажалай бүлэгөөр зүбшэн хэлсэгдэһэн байна.
"Электрон билет худалдан абалгын асуудалаар https://vsrp.ru сайт дээрэ хаража болохо", - гээд уласай аяншалгын яаманай хэблэлэй албан дуулгана.
Буряад Уласай аяншалгын яаманай хэблэлэй албанай гэрэл зураг
