906
Үертэ абтаһан Үбэр Байгалай хизаарай 200 гаран үхибүүдтэ амаралгын зунай лагерьнуудта амарха талаар туһа хүргыт гэжэ хүршэ можын засаг зургаан Буряад Уласай Засагай газарта хандаба.
Буряад Уласай Толгойлогшо Алексей Цыденов июлиин 16-да спортын болон залуушаалай бодолгын талаар яаман болон ниигэмэй хамгаалгын яамануудта энэ асуудал шиидхэхэ талаар даалгаба. Тус яамануудта хүршэ можын үхибүүдэй лагерьнуудта амарха талаар тоололгонуудые хэжэ эхилээ.
Буряад Уласай зүүн хойто аймагуудта ехэ хура борооһоо боложо, тала дайда уһанда абтана, харгынууд угаагдана. Тиихэдэ Бабанта болон Муяын аймагуудта харгынууд уһанда абтаһан байна. Бабанта аймагта Талая горхон эрьеһээ халижа, Рассошино нютаг хүрэтэр авто унаагаар хүрэхөөр бэшэ болобо. Тиигэбэшье хүршэ можонуудта ороходоо, Буряад уласта үертэ абтаха ушар аюултай бэшэ гэжэ сэгнэгдэнэ.
Буряадай уларилай түбэй мэдээсэлээр, улас дотор июлиин 16-18-най үдэрнүүдтэ хура бороотой гэжэ багсаамжалагдана. Ородой Холбоото Уласай Онсо байдалай талаар яаманай Буряадтахи хүтэлбэри уласай онсо байдалай талаар агентствотой хамта нютагай засагай байгууламжануудай засаг дарганартай суглаа үнгэргэжэ, тохёолдоһон байдал болон тэрэниие усадхаха талаар хэмжээ ябуулаганууд тухай хэлсэбэ. Онсо байдал һэргылхэ талаар түсэб табиха, ажаһуугшадта аюул тухай дуулгаха дохёо, уһанда абтажа боломоор нютагуудай ажаһуугшадые саг зуурын байрануудые бэлдэхэ, шалгаха гэжэ хэлсэгдээ. Энэ талаар тохёолдоһон байдал үдэр бүри хинагдана.
