Гэр бүлын, инаг дуранай, үнэн сэхэ ажаһуудалай нангин һайндэр гэжэ июлиин 8-най үдэр гэжэ мэнэ һая, 2008 ондо, соносхогдоһоншье һаа, олоной дуратай һайндэр болонхой. Энэ һайндэртэ зорюулагдаһан хэдэн ехэ баярай хэмжээнүүд Буряадаймнай ниислэл хотодо үнгэргэгдөө.
Ажабайдалай юрьёон соо олонхи зон инаг дуранай абьяас, гэр бүлын жаргал, бэе бэедээ энхэрэл юунтэйшье жэшэшэгүй, юугээршье сэгнэшэгүй ажамидаралаймнай нангин баялиг гэжэ бодоношьегүй, сэхыень хэлэбэл, ойлгоношьегүй. Тиимэһээ иимэ һайндэр соносхогдожо, бидэ бүгэдэнэй инаг дуранай халуун абьяаста абтажа, гэр боложо, маанадые түрэһэн, үргэһэн, хүмүүжүүлһэн, ажабайдалай үргэн харгыда гаргаһан эжы абаяа, таабай төөдэйгөө золгохо, хүндэлхэ, талархалаа мэдүүлхэ нангин үдэр болобо гэжэ тэмдэглэе.
Гүрэн түрэмнайшье, засаг зургаамнайшье энэ һайндэрые тэмдэглэжэ, олон жэлдэ эб хамта ажаһуудаг бүлэнэрые дэмжэжэ, амаршалжа, бүгэдэнэй жэшээ болгохо гэжэ оролдоно. Тиихэдэ энэ нангин хэрэгтэ соёлоймнай ажалшад ехэ ажал зорюулна гэжэ хүндэтэйгөөр тэмдэглэе.
Манай сурбалжалагша Исай Калашниковай нэрэмжэтэ түбэй номой санда, “Юбилейный” парк соо болон Николай Бестужевай нэрэмжэтэ ород драмын театр соо үнгэргэгдэһэн хэмжээ ябуулгануудта байлсаба.
Түбэй номой сангай танхим соо залуушье, наһатайшье гэр бүлэнүүд үхибүүдтэеэ, аша зээнэртэеэ суглараа. Олон зон арадайнгаа заншалта хубсаһаар ерэхэдээ, өөһэдынгөө бэлдэһэн баһал заншалта эдеэ хоол, гар урлалнуудые асаржа, үзэмжэдэ дэлгээ. Казаах бүлые Гермек Елтаевич, Юлия Борисовна Карачуковтан түлөөлөө; хасагуудые - Георгий Васильевич, Людмила Николаевна Григорьевтан болон Александр Иванович, Надежда Георгиевна Кучумовтан; шэмээшэгүүдые болон үхибүүдые үргэжэ абаһан бүлэнүүдые - Андрей Анатольевич, Татьяна Григорьевна Харинтан, Мухар-Шэбэрэй Дмитрий Ермилович, Любовь Николаевна Благушевтан. Буряадта ажаһуудаг еврейнүүдэй соёлой “Симхат хаим” бүлгэмэй Луиза Александровна Мальцева Канадын Торонто хотодо мүнөө ажаһуудаг Улаан-Үдэһөө ошоһон Владимир Францевич, Ии Борисовна Ротт бүлын хэблүүлһэн хэдэн номуудтай танилсуулаа. Һонирхолтойнь гэхэдэ, Улаан-Үдэ тухай ехээр бэшэгдэһэн байна. Энэ үедэ Шэнэ Зеландиһаа айлшалһан наһатайшаг аяншан орожо, энэ хэмжээ ябуулгаар ехэтэ һонирхоо.
Номой сангай ахамад библиотекарь Маргарита Баторовагай оролдолгоор гэр бүлэнүүд тухай һонирхолтой видео-сюжедүүд харуулагдажа, хабаадагшад өөһэдөө ирагуу һайхан дуунуудые гүйсэдхөө. Кучумовтан хасаг дуу дуулаа, Александр Иванович энэ дуу өөрөө зохёоһоноо мэдүүлээ. Гермек Елтаевич казаах арадай домбра дээрэ наадажа, бултаниие баясуулаа. Эндэ Григорьевтанай хүгжэмтэ бүлые онсолон тэмдэглэмээр. Хасагуудай дуунуудта дуратайгаараа бидэ хоёр уулзажа, хуби заяагаа ниилүүлээ һэмди гэжэ Георгий Васильевич Людмила Николаевна хоёр хөөрэнэ. Ашаниинь бүришье бэрхэ – дуулана, хатарна, хүгжэм наадана.
Эндэ сугларһан бүлэнүүд соо жара гаран жэл соошье хамта ажаһууһан, арба гаран үхибүүдтэйшье бүлэнүүд байгаа гэжэ тэмдэглэе. Жэшээлхэдэ, Благушевтан 11 үхибүүтэй, 3 бэритэй, нэгэ хүрьгэтэй, 8 аша зээтэй.
“Юбилейный” парк соо үнгэргэгдэһэн “Хамтадаа жаргалтай” гэһэн фестивальда табин гэр бүлэнүүд суглараа. Баярай жагсаалай удаа багахан тоглолто боложо, хоорондуурнь Баярай бэшэгүүд, үнэтэ бэлэгүүд барюулагдаа. Түсэбэй ёһоор гэр бүлэнүүд хатар наадаяа дэлгээ, элдэбын урилдаанда, мүрысөөнүүдтэ хүхюу зоригтойгоор хабаадалсаа.
Эндэ ехэ һонин мэдээсэлнүүд үгтөө. Үнгэрһэн жэлдэ гэр бүлэ болоһон зоной тоо олошороо: 6333 гэр бүлэ мүндэлөө. Энэ 2016 онойхидо орходоо, 684 гэр бүлөөр олон болоһон байна. Харин һалаха ушарнууд үсөөрөө.
2017 ондо Буряадтамнай 7402 хүбүүд, 6894 басагад түрөө. Эгээл олон үхибүүд Хэжэнгэдэ, Зэдэдэ, Захааминда түрөө.
Буряадаймнай бүхы аймагуудһаа мэдээжэ гэр бүлэнүүд уригдажа, Ород драмын театр соо баярай хэмжээ ябуулгада хабаадаа. Улаан-Үдын мэрэй уялга гүйсэдхэгшэ Александр Иринчеев бултаниие амаршалжа:
-Хүндэтэ нүхэд! Таанадта аза жаргал, үнэн сэхэ инаг дура, элүүр энхые, амгалан тайбаниие,болон аза талааниие хүсэнэб. Гэр бүлэдөө хододоо бултанайтнай дуран бадаржа, бэе бэеэ хүндэлжэ, эбтэй эетэй ажаһуугыт даа! – гэжэ сугларһан гэр бүлэнүүдтэ хүсэбэ.
25 жэлһээ үлүү эб хамта ажаһуудаг хорин гэр бүлэнүүд Ородой Холбоото Уласай медальнуудаар шагнагдаа. Долооһоо олон үхибүүдые хүмүүжүүлжэ байһан бүлэнүүд Буряад Уласай медальнуудаар шагнагдаа. “Жэлэй гэр бүлэ” гэһэн Бүхэроссиин урилдаанда илаһан табан гэр бүлэнүүдтэ үнэтэ бэлэгүүд барюулагдаа.
Тиихэдэ Буряад Уластаймнай сасуу зон биил юм байна. Тиимэһээ 95-тайшуул хүндэтэ бэлэгүүдтэ хүртөө. Мүнөө үедэ 50 жэлэйнгээ алтан түрые тэмдэглэжэ байһан, үшөөшье олон жэлнүүдтэ эб хамта ажаһуудаг гэр бүлэнүүд олон байна.
Авторай гэрэл зураг