934
Байгша ондо Улаан-Үдэдэ харгынуудые заһабарилга болон һэльбэн шэнэдхэлгэдэ 500-гаад сая түхэриг һомологдохоор түсэблэгдэнэ гэжэ Буряад Уласай Толгойлогшо Алексей Цыденов ниислэл хотын харгынуудые үсэгэлдэр, июлиин 18-да, шалгаха үедөө хэлэбэ.
Буряадай ниислэл Улаан-Үдэ болон хото шадарай дүрбэн аймаг «Аюулгүй, һайн шанартай харгынууд» гэһэн түсэлдэ үнгэрһэн жэлдэ оруулагдаа гэжэ һануулнабди. 2017 ондо 56 модонһоо дээшэ харгынуууд заһабарилагдаа. Мүнөө жэл зуудахи кварталнууд, Орловская, Комарова гудамжануудта, тиихэдэ Южлаг, Тальцы һууринуудаар Загарай аймаг хүрэтэр гараһан харгын заһабарилга дүүрэхэ. Тиихэдэ Стеклозавод, Дивизионный болон Южный һуурин хүрэтэр болон хэдэн шухала харгынууд заһабарилагдаха.
- Заһабарилагдаһан харгынуудта мэргэжэлтэ шүүбэри, лабораториин шэнжэлэл хэһэнэй удаа тэдэ ашаглалгада тушаагдана. Харгын эрилтэнүүдтэ таараагүй һаань, бидэ мүнгыень түлэхэгүйбди. Харгы бариһан эмхи өөрынгөө мүнгөөр алдуунуудаа усадхаха юм. Иимэ ушар болоһон байна. Харгынуудые заһабарилга болон һэльбэн шэнэдхэлгэ хинагдана, - гэжэ Буряадай Толгойлогшо хэлэбэ.
Харгын ашаглалгада тушаагдаха шиидхэбэри тусхай комисси абана. Тэрэнэй бүридэлдэ Буряад Уласай Засагай газарай, Улаан-Үдын захиргаанай болон олоониитын эмхинүүдэй түлөөлэгшэд ороно.
«Аюулгүй, һайн шанартай харгынууд» гэһэн түсэл бэелүүлгэдэ түрүүн ажаһуугшадай һанамжа болон бүхэроссиин арадай фронтын «Карта убитых дорог» гэһэн түсэлһөө дурадхалнууд хараалагдана.
Харгы заһабарилагшадтай уулзахадаа, Буряад Уласай Толгойлогшо харгын хушалтын шанар болон тушаагдаха болзорто анхаралаа хандуулаа.
- Байгша ондо Улаан-Үдэдэ 11 газарта 32 модоной зайда харгы заһабарилгадаха. Бүхыдөө «Аюулгүй, һайн шанартай харгынууд» гэһэн түсэлөөр 119 модоной зайда харгы барилга ябуулагдаха. Энэ программада Буряад Улас 2025 он болотор хабаадажа, харгынуудаа һайн шанартай болгохо ёһотойбди. Байгша ондо 50 хубиһаа дээшэ харгынууд эрилтэнүүдтэ тааруу, энэ тоо дээшэлүүлхэбди, - гэжэ Алексей Цыденов хэлэбэ.
Стеклозавод болон Дивизионный микрорайонууд хүрэтэр ошоһон харгы зунай һүүл багта ашаглалгада тушаагдаха.
- Эндэ харгы үргэн болгогдоо. Августын 1 болотор заһабарилгын ажалнуудые дүүргэжэ, тротуар, автобусуудай тогтоохо буудал, харгынуудые болбосон түхэлтэй болгохо талаар ажал хэгдэжэ, сентябриин 1 болотор дүүргэхэ түсэбтэйбди, - гэжэ харгы заһабарилгын эмхиин түлөөлэгшэ хэлэбэ.
Тиихэдэ Буряад Уласай Толгойлогшо Алексей Цыденов Ключевская гудамжада харгы заһабарилгын ажалнуудтай танилсаа. Эндэ ажал болзор соогоо хэгдэжэ, харгын шанар эрилтэнүүдтэ тааруу байха гэжэ харгы заһабарилагшад хэлэһэн байна.
Анна Огороднигой гэрэл зурагууд
