795
Байгша оной июлиин 23-25-най үдэрнүүдтэ Буряадай гүрэнэй ехэ һургуулида «Байгал-2018» гэһэн залуушуулай бүхэроссиин ТЕХНО-фестиваль гурбадахияа үнгэргэгдэхэ. Энэ хэмжээ ябуулгада Ородой Холбоото Уласай бүхы можо нютагуудай эрдэмэй-техническэ һалбарида хүдэлдэг залуушуул сугларха. Тиихэдэ һурагшад, оюутад, Ород гүрэнэй Залуушуулай шэнэ юумэ нэбтэрүүлхэ түбэй, болбосоролой эмхинүүдэй мэргэжэлтэд, болбосоролой эмхинүүдэй хүтэлбэрилэгшэд болон багшанар хабаадаха.
Эрдэмэй-техническэ һалбарида бага үйлэдбэринүүдые хүгжөөлгэ дэмжэдэг жасын дэмжэлгээр Залуушуулай шэнэ юумэ нэбтэрүүлхэ «Инсайт» түб, Буряад Уласай Болбосоролой болон эрдэм ухаанай яаман, Буряад уласай спортын болон залуушуулай бодолгын талаар яаман, Буряад Уласай үйлэдбэриин болон худалдаа наймаанай яаман, Буряад Уласай худалдаа наймаанай-үйлэдбэриин танхим залуушуулай фестиваль эмхидхэнэ.
«Манай фестиваль хадаа эрдэмэй-техническэ һалбарида ажал ябуулдаг залуушуулай талмай болоно. Эндэ залуушуул, нэн түрүүн, дүй дүршэлөөрөө хубаалдана. Тиихэдэ хабаадагшадай зохёохы, эрдэм ухаанай шадабари дэмжэхэ, хүгжөөхэ зорилготой хэмжээ ябуулга эмхидхэгдэнэ. Бэлиг талаантай залуушуул сугларжа, харилсаха аргатай», - гэжэ фестивалиин хүтэлбэрилэгшэ Людмила Гармаева хэлэбэ.
«Байгал-2018» ТЕХНО-фестивалиин үедэ техническэ шэглэлэй һалбарида шэнэ юумэ нэбтэрүүлгын хүгжэлтын асуудалнуудаар зүбшэхэ юм. Фестиваль гурбан бүлэгһөө эмхидхэгдэхэ. Хэмжээ ябуулгада түрүүлһэн залуушуул Буряад уласай Байгал шадарай аймагай Гремячинск һууринда энэ шэглэлээр үнгэргэгдэхэ түгэсхэлэй сессидэ хабаадаха аргатай.
