774
Буряад Уласай Толгойлогшо Алексей Цыденовэй хүтэлбэри доро бэлиг талаантай үхибүүдтэй ябуулагдадаг ажалай хүгжэлтэ, үсөөн хүүгэдтэй сэсэрлигүүдтэ мүнгэ һомололго тухай асуудалнуудаар суглаан үнгэргэгдэбэ.
Бэлиг талаантай үхибүүдые дэмжэхэ, хүгжөөхэ асуудалаар Буряад Уласай болбосоролой болон эрдэм ухаанай сайд Баир Жалсанов элидхэбэ. Улас дотор бэлигтэй үхибүүдые дэмжэхэ талаар олимпиада, хуралдаанууд үнгэргэгдэнэ, хэшээлһээ гадуур кружок, секцинүүд ажал ябуулна, нэмэлтэ һуралсалай хэшээлнүүд үнгэргэгдэнэ. Нэмэлтэ һуралсалай һалбарида «Кванториум» гэһэн хүүгэдэй технопарк бариха түсэл онсолон тэмдэглэмээр.
«Кванториум» гэһэн хүүгэдэй технопарк бариха түсэл бэелүүлэгдэбэл, 800-һаа доошо бэшэ һурагшад байгаалиин-эрдэмэй болон техническэ шэглэлээр һуралсал гараха аргатай. Мүнөө байшанда ехэ заһабари хэгдэнэ. «Сколково» жасада 9 багша һуралсал гараа», - гэжэ Баир Жалсанов хэлэбэ.
Буряад Уласай болбосоролой болон эрдэм ухаанай яаман уласай 10 олимпиада болон хуралдаа үнгэргөө. 2017-2018 һуралсалай жэлдэ хуби ниилүүлһэн «Селенгинский целлюлозо-картонный комбинат» болон «Улаан-Үдын авиациин завод» гэһэн бүлгэмүүд мүнгэ һомолжо, хоёр олимпиада үнгэргэһэн байна.
«Үйлэдбэринүүд бэлиг талаантай үхибүүдые элирүүлжэ, тэдэниие «дали дороо» абажа, һуралсалай, мэргэжэлэй талаар туһа хүргэхэ аргатай. Сэлэнгын комбинат олимпиадада илагшадтые саашадаа һургаха, стипенди түлэхээр бэлэн байһанаа мэдүүлээ. Уласай үйлэдбэринүүд болон олзын хэрэг эрхилэгшэд энэ жэшээ хаража, саашадаа һайн заншалтай болохобди гэжэ найданабди», - гэжэ Баир Жалсанов тэмдэглэбэ.
Суглаанай дүнгүүдээр, Буряад Уласай Засагай газар болон «Сириус» гэһэн болбосоролой түбтэй ажалаа суг ябуулха тухай хэлсээ баталха шухала гээһн шиидхэбэри абтаба.
Үсөөн хүүгэдтэй сэсэрлигүүдтэ мүнгөөр хангаха асуудалаар Баргажан аймагай нютагай засагай байгууламжын болбосоролой таһагай хүтэлбэрилэгшэ Елена Козулина элидхэбэ.
Энэ асуудалаар хэлсэһэнэй удаа, ондоо можо нютагуудай дүршэлһөө «үсөөн хүүгэдтэй сэсэрлиг» гэһэн ойлгомжо эрхын талаһаа хаража үзэжэ, Буряад Уласай болбосорол тухай хуулида хубилалтануудые оруулха тухай хэлсэбэ.
Буряад Уласай болбосоролой болон эрдэм ухаанай яаманай хэблэлэй албанай гэрэл зураг
