​Шэнэ һургуулинууд баригдахань

Улаан-Үдын һургуулинуудта үглөөнһөө үдэшэ хүрэтэр хэшээлнүүд үнгэрнэ - үхибүүд аяар гур­бан халаанда һурана. Энэ байдалые һайжаруулхын түлөө хэдэн шэнэ һургуули баригдахаар хараалаг­дана. Һаяхана Ородой Холбоото Уласай Засагай газарай түрүүлэгшэ Дмитрий Медведев энэ орёо байдал тухай Буряад Уласай Толгойлогшо Алексей Цыденовтэй уулза­жа хөөрэлдэхэдөө, мүнгэ һомолхо тухай найдуулаа.

Һүүлэй мэдээгээр, Бу­ряадта сентябриин 1-һээ хойшо аяар 1300 гаран һурагшад гурбадахи халаан­да үдэшэ орой һураха боло­но. Энэ тоо үшөөшье ехэ бай­ха һэн. Юуб гэхэдэ, нэгэ сагта һургуули бүхэндэ класс со­охи үхибүүдэй тоо дээшэ­лэгдээ. Мүнөө сагта олонхи класста 36 үхибүүн тоолог­доно. Харин хиналтын ал­бануудай мэдээсэһээр, анги бүхэндэ 25 хүн һураха ёһотой. Һургуулиин хүтэлбэрилэгшэд иигэжэл байдалай бэрхэшээлые ши­идхэжэ байгаа.

Буряад Уласай Эрдэм ухаанай болон болбосоро­лой яаманай мэдээсэһээр, 8 һургуули һэльбэн шэнэлэг­дэхэ, шэнээр бодхоогдохо юм. Буряад Уласай Толгой­логшо Алексей Цыденовай хэлэһээр, тус асуудал шиид­хэхын түлөө 2019-2020 ону­уд үгтэнэ.

Улаан-Үдын 25-дахи һургуулиин класс бүхэн 36 шабиһаа бүридэнэ. Бүхы дээрээ эндэ 1700 үхибүүн тоологдоно. Һургуулиин байшан хэды томо гэжэ һанагдабашье, бүхы һурагшадые хоёр халаан­да багтаажа шаданагүй. Тиимэһээ эндэ үшөө нэгэ шэнэ байшан бодхоогдо­хо болобо. Тэрэ гурбан дабхарһаа бүридэхэ гээшэ. 250 һурагшад нэгэ доро тэн­дэ номоо үзэхэ аргатай. Үшөө тиихэдэ шэнэ эрилтэнүүдтэ харюусама эдеэ хоол бариха столово шэнэ байшан соо ха­раалагданхай.

33-дахи гимназида 1540 хүн һурана. Эндэ ганса ни­ислэл хотын түбэй үхибүүд һурана бэшэ, мүн Сэлэнгэ мүрэнэй зүүн эрьеын олон хүүгэд эндэ ном шудал­на. Үхибүүдые багтаахаа болиһон гимназиин хажууда гурбан дабхар шэнэ байшан бодхоогдохо. Тэндэ нэгэ до­роо 325 үхибүүд һураха юм.

- Манай гимназида тон олон түрэлхид үхибүүдээ һургахаяа һанадаг. Тэдэ­ниие намнаха аргагүйбди. Һургуулидамнай һуури хэды дуталдабашье, һайн эрдэм мэдэсэ үгэхэ гэжэ багшанар оролдоно. Аяар табан нэ­гэдэхи классай хүүгэд сен­тябриин 1-дэ богоһыемнай алхажа орохо, - гэжэ 33-дахи гимназиин захирал Дарима Халтуева хөөрэнэ.

Һуралсалай шэнэ бай­шан баригдаһанай удаа һургуулиин стадион һэльбэн шэнэлэгдэхэ. Мүнөө тэрэ стадион зорюута заһабарилагданагүй.

33-дахи гимназида, 44- дэхи, 54-дэхи, 37-дохи бо­лон 8-дахи һургуулинуудта үхибүүдтэ һуралсалай һууринууд дуталдана. Энэ­эниие шиидхэхын түлөө Сэлэнгын зүүн эрьедэ хоёр томо һургуули баригдаха.

Поселье һуурин хадаа Ивалга аймагай дэбисхэртэ оршоно. Эндэ 450 һууритай һургуулида тусхай газар үгтэнхэй. Аймагай засаг дарга Виктор Очировой хэлэһээр, ганса Поселье дээрэ 1200 һургуулиин наһанай үхибүүн тоологдоно. 3-7 наһатай хүүгэдэй тоо баһа бага бэшэ – 1200 хүн хүрэнхэй.

Улаан-Үдын “ВАИ” гэһэн автобусно буудалһаа холо бэшэ Автотранспортна гу­дамжаар һургуули бариг­дажа эхилхэнь. Энэ 1275 һууритай һургуули һүүлэй үедэ харюусама технологи­той классуудтай һуралсалай гуламта болохо юм.

Буряад Уласай Толгой­логшо Алексей Цыденов дээрэ нэрлэгдэһэн һургуулинуудаар ябахадаа, ур­гажа ябаа залуу халаанда һайн һуралсал үгэхэ тухай нэн түрүүн һанажа ябаха ёһотойбди гэжэ хэлээ. 

Анна Огороднигой гэрэл зурагууд