​Шагай нааданда шадабари хэрэгтэй

Шагай нааданай мүрысөөн “Ал­тарганын” бүридэлдэ орой­доол хоёрдохиёо оруулагдаа гээд хэлэлтэй. Буряад Уласай түлөөлэгшэд сооһоо Эрдэни-Дари До­ржиева тус мүрысөөндэ ори ганса алтан медаль абажа шадаа.

Эрдэни-Дари Бадмаевна Доржиевагай амжалта туйлаһандань гайхалгүй. Юуб гэ­хэдэ, тэрэ бүхы наһаараа шагай наадажа ябана бшуу.

- Ярууна аймагай Иисэнгынби. Үхибүүн ябахаһаа хойшо шагай наадажа эхилээб. Аяар 500 гаран шагай манай­да байгша бэлэй. Тэрээнээрээ наадажал, өөдөө болоһон байнабди. Бадма Дондоков, Дашанима Цыденов, Тумэн Самбуев, Бад­ма-Ханда Тарбаева болон бусад наададаг һэмди, - гэжэ Эрдэни-Дари Доржиева бага наһаяа һанан дурсана.

Загарай аймагай Асагад һууринда 40 гаран жэл соо түбхинэжэ ажаһууһан баг­ша, һургуулида хүдэлхэдөө, үхибүүдые шагай наадуулжа һургадаг һэн. Эндэхи хүбүүд, басагад ехэ дуратайгаар багшын хэшээлнүүдтэ ябадаг байгаа.

Мүнөө үедэ Эрдэни-Дари Бадмаевна Агван Доржиевай нэрэмжэтэ музейн за­хиралаар, мүн “Талын нүүдэлшэн” гэһэн этнокомплексын мэргэжэлтэнээр хүдэлнэ. Хэды ехэ ажалтайшье һаа, шагай наадаяа орхиногүй.

- Үнгэрһэн үбэл Москва ошожо, Федерациин зүблэлдэ үнгэргэгдэһэн Бу­ряадай үдэрнүүдтэ олон тоото ноёдто шагай наада харуулжа һургаһан байнаб­ди. Манай наадые Федерациин зүблэлэй хүтэлбэрилэгшэ Валентина Матвиенко ехэ һонирхожо хараа, - гэжэ Эрдэни-Дари Бад­маевна хөөрэнэ.

Июлиин 1-дэ Эрдэни-Дари Доржиева “Наадан-Сурхарбаанда” шүүжэ, Буряад Ула­сай таба дахин чемпионой нэрэ зэргэдэ хүртөө. Оройдоол долоон хоног болонгүй, тэрэ “Алтарганада” дахинаа илалта туйлаа.

Шагай нааданай эгээл һонирхол ехээр татадаг “мори урилдаан” гэжэ зүйлдэ ал­тан медаль абааб. Нааданай дүрим эндэ ехээр ондоо болгогдоо. Ядалсан алдаад, һалахамнай гү гэжэ байгаад, нааданда оролсообди. Тэрэ дүримдэнь нэгэ бага дадаад шангараабди. Түгэсхэлэй шатада Шэнэхээнһээ ерэһэн эрэ хүнтэй болон Мон­голой наһатайхан эхэнэрнүүдтэй уулзажа, шүүжэ гараһандаа баяртайб, - гэжэ илагша мэдүүлнэ.

“Алтаргана” нааданда шагай нааданай гурбан зүйлөөр мүрысөөн болоо гэжэ хэлэ­хэ хэрэгтэй. Тэндэ эгээл олон медальнуудые Ага тойрогой түлөөлэгшэд абаа.

Авторай гэрэл зураг