​«Амарлин» дасанай рамнай - августын 18-да

Мухар-Шэбэрэй Боом, Нарһата ню­тагуудай хоорондо үзэсхэлэнтэ һайхан газарта «Амарлин» гэһэн дасан гурбан жэлэй саада тээ баригдажа эхилээ. Августын 18-да дасанай рамнай болохо гээд дуулгая. Үглөөнэй 8 сагһаа хурал эхилхэ, 11 сагһаа - баярай ёһолол.

Энэ барилга Баясхалан ламын удари­далга доро захалаа. Оөрөө Нарһата нютаг­та түрэһэн. Ивалгын дасанда хоёр жэлэй туршада һурасал гараад, табан жэл Энэд­хэгэй Гоман дасанда Бурхан багшын ном шудалһан. Тиигэжэ Мухар-Шэбэрээ бусаад, олохон жэлдэ нютагаархинайнгаа хэрэг бүтээһээр ябана. «Түгнымнай тала хүдөө ажахыгаараа хүсэтэй. Табан хушуу малаа үдхэхэ ёһотойбди. Уг ажалаа һэргээхэдээ, нютаг нугамнайшье хүгжэжэ, залуушуул­найшье хүдөө руугаа таталдажа эхилхэ», - гээд, Баясхалан лама һанамжалдаг байна. Тиигэжэ хэдэн жэлэй саада тээ өөрынгөө ажахы байгуулаад, хони малаа үсхэбэрилнэ.

«Түргэн горхон голдоо хүрэдэггүй» гэжэ арадаймнай алтан һургаалай үгэнүүд бии. Тиин бидэ дасанаа гурбан жэлэй саана эхи­лээшье һаа, яаралгүйхэнөөр, дүмүүхэнээр ябуулха гэжэ оролдонобди. Энэ хэрэгтэ эхинһээнь хам оролсожо, туһалжа байһан утын Түгнын хүн бүхэндэ ехэ һайниие хүргэхэ бай­наб гээд, Баясхалан лама хэлэнэ һэн.

Дашима ЦЫДЫПОВА