1016
Буряад Уласта бэдэрэлгэ-абаралгын һайн дуратанай «Лиза Алерт» гэһэн бүлгэмэй һуралсал үнгэргэгдэбэ.
Москва хотын отрядай заабаришад, Буряад уласай бэдэрэлгэ-абаралгын албанай, Байгалай бэдэрэлгэ-абаралгын отрядай болон Дотоодын хэрэгүүдэй яаманай хүдэлмэрилэгшэд Буряадай болон Эрхүү можын һайн дураараа туһа хүргэгшэдтэ һуралсал үнгэргэбэ.
Һуралсал хоёр шатаһаа бүридэһэн байна. Түрүүшын үдэр Буряад уласай бэдэрэлгэ-абаралгын албанда хайшан гэжэ бэдэрэлгэ ябуулхаб, яажа туһа хүргэхэб гэжэ мэдээсэгдээ. Хоёрдохи үдэр Байгал шадарай аймагай Пыхта газарта бэдэрэлгын ажал ябуулагдаа. Тиихэдэ танигдаагүй газарта зүг шэгээ алдангүй, компас, навигатор, раци яажа хэрэглэхэб гэжэ эдэбхитэд һуралсал гараа.
- Хоёрдохи үдэр квест үнгэргэдөө. Һуралсалай ёһоор, тоног хэрэгсэлнүүдые барижа, үгы болоһон хүнүүдые бэдэрхэ даабари хабаадагшад дүүргэбэ. Төөриһэн хүниие бэдэрэлгэ яажа ябуулхаб гэжэ хабаадагшад эрдэм мэдэсэтэй болобо, - гэжэ Буряадтахи «Лиза Алерт» отрядай түлөөлэгшэ Вероника Ерофеева хэлэбэ.
