654
Байгша оной августын 2-3-най үдэрнүүдтэ Улаан-Үдэдэ Байгалай мэдээсэлэй хуралдаан үнгэргэгдэхэ. Энэ хэмжээ ябуулгада Сибириин федеральна тойрогой медиа болон IT мэргэжэлтэд хабаадаха юм.
- Байгалай мэдээсэлэй хуралдаан арбаад жэлэй түүхэтэй. Анха түрүүшынхиеэ энэ хэмжээ ябуулга 2009 оной июнь һарада үнгэргэгдөө. Байгша ондо Сибириин федеральна тойрогой мэргэжэлтэд, «Сибирское соглашение» эблэлэй гэшүүд хуралдаанда хабаадаха. Эдэнэр мэдээсэлэй олониитын хүгжэлтэ, шэнэ оньһон технологи , элүүрые хамгаалгын һалбарида цифровой эдэй засаг нэбтэрүүлхэ талаар хэлсэхэ юм. Тиихэдэ сурбалжалагшад болон хэблэлэй албануудай хүдэлмэрилэгшэдтэ һуралсал эмхидхэгдэхэ. Хуралдаанда хабаадагшадта аша үрэтэйгөөр ажалаа ябуулхыень хүсэнэб, - гэжэ Буряад Уласай Толгойлогшо Алексей Цыденов хэлэбэ.
Хуралдаанай хэмжээндэ «Информационные технологии» болон «Медиа» гэһэн секцинүүд ажалаа ябуулха.
Байгалай мэдээсэлэй хуралдаанда «Эхо Москвы» радиостанциин ахамад эрхилэгшэ Алексей Венедиктов «Медиа» секцидэ хабаадаха. Тэрэ «Современные угрозы профессии журналиста. Социальные сети. Анонимность. Подавление профессиональной информации» гэһэн сэдэбээр элдхэжэ, уласай олондо мэдээсэл тараадаг хэрэгсэлнүүдэй асуудалнуудта харюусаха. Тиихэтэй хамта Ородой Холбоото Уласай философ, политолог, полит-зүбшэлэгшэ, профессор Олег Матвейчев баһал сурбалжалагшадтай уулзаха юм.
«Информационные технологии» талмайда хабаадагшад цифровой эдэй засаг нэбтэрүүлэгдэжэ эхилхэ асуудалаар зүбшэхэ юм. Эндэ эмхидхэгдэхэ пленарна суглаанда Буряад Уласай Толгойлогшо Алексей Цыденов болон хизаарламал харюусалгатай хаамал «Ростелеком» бүлгэмэй Вице-Президент Николай Зенин гэгшэд хабаадаха.
Ородой Холбото Уласай түрүүлэн ябаһан IT-компанинуудай түлөөлэгшэд уласай эмнэлгын эмхинүүдтэ эмнэлгын мэдээсэлэй нэгэдэмэл системэ нэбтэрүүлгэ, тэрэниие хэрэглэлгэболон бусад асуудалнуудаар хэлсэхэ.
Тиихэдэ Байгалай мэдээсэлэй хуралдаанда Ород гүрэнэй арад яһатанай харилсаан тухай бэшэдэг сэтгүүлшэд сугларжа, семинар, тренинг, дискуссинуудта хабаадаха.
Хоёр үдэрэй туршада ябуулагдаха ажал Зүүн Сибириин гүрэнэй технологи болон хүтэлбэриин дээдэ һургуулида үнгэргэгдэхэ. Байгалай мэдээсэлэй хуралдаан Буряад Уласай Засагай газар, Ородой Холбоото Уласай Хэлхеэ холбооной болон олондо мэдээсэлгын яаман, «Ростелеком» бүлгэм болон «Ариг Ус» компаниин дэмжэлгээр үнгэргэгдэнэ.
Буряад Уласай Засагай газарай хэблэлэй албанай гэрэл зураг
