652
Байгша оной июлиин 26-да Форум «Буряад Уласай хүгжэлтэдэ худалдаа наймаанай үүргэ» гэһэн хуралдаан үнгэргэгдөө. " Буряад Уласай бага олзын хэрэг эрхилэлгэ дэмжэлгын жаса" гэһэн эмхиин дэмжэлтээр хуралдаан эмхидхэгдэбэ. Энэ хэмжээ ябуулга худалдаа наймаанай һалбариин хүдэлмэрилэгшэдэй мэргэжэлтэ үдэртэнь зорюулагдаа.
Буряад Уласай үйлэдбэриин болон худалдаа наймаанай сайд Алексей Мишенин сугларагшадые мэргэжэлтэ һайндэрөөрнь амаршалаад, худалдаа наймаанай һалбариин шанар дээшэлээ гэжэ тэмдэглэбэ. Алексей Мишенинэй хэлэһээр, эдэй засагай һалбарида худалдаа наймаанай үүргэ ехэ.
Худалдаа найманай һалбариин хүдэлмэрилэгшэдэй һайндэр 1952 онһоо тэмдэглэгдэнэ, энэ хугасаада элдэб шатанууд дабагдаа гэжэ Буряад Уласай Засагай газарай Түрүүлэгшын эдэй засагай хүгжэлтын талаар орлогшо Игорь Зураев хэлэбэ.
- Худалдаа наймаанай һалбариин хүдэлмэрилэгшэд эдэй засагай һалбарида туһа хүргэһэн саг байха. Энэ һалбарида ходол мүнгэн зөөри оруулагдажа, шэнэ юумэн нэбтэрүүлэгдэжэ байдаг. Мүнөө интернедээр худалдаан эдэбхитэй нэбтэрүүлэгдэнэ. Буряад улас бүхы дэлхэйдэ үзэгдэжэ байһан худалдаа наймаанай һалбарида хабаадана, - гэжэ Буряад Уласай Засагай газарай Түрүүлэгшын эдэй засагай хүгжэлтын талаар орлогшо тэмдэглэбэ.
Буряад Уласай Үйлэдбэриин болон худалдаа наймаанай сайдай орлогшо Алексей Оловянниковай хэлэһээр, энэ һалбарида 65 мянганһаа дээшэ хүн хүдэлнэ. Худалдаа наймаанай һалбариин үйлэдбэринүүд жэл бүри 3,3 миллиард түхэригэй налог татабари түлэнэ.
-Ниигэмэй-эдэй засагай һалбарида хубилалтануудай болоходо, энэнь худалдаа наймаанда эли болодог. Ажаһуугшадай олзо, сэнгэй хубилалта худаалдаанай хэмжээндэ нүлөөлдэг, гэжэ Алексей Оловянников хэлэбэ.
Һүүлэй найман жэлдэ худалдаа наймаанай эрьесэ 2,5 дахин, 68 миллиардһаа 170 миллиард хүрэтэр дээшэлээ. 2018 оной июлиин 1 мэдээгээр худалдаа наймаанай һалбарида 6293 эмхи ажалаа ябуулна.
Буряад Уласай Засагай газарай хэблэлэй албанай гэрэл зураг
