​Буряад Уласай ой модоной ажахыда ондоо шата

Буряад Уласта федеральна антимонопольно албан ехэ суглаа уржадэр эмхидхэбэ. Эндэ ой модо болон тэдэнэй зүйлнүүдые худалдан наймаалха талаар асуудалнууд хэлсэгдээ.

Буряад Уластахи антимонопольно албанай хүтэлбэрилэгшэ Елизавета Потаповагай хэлэһээр, ойн ажахын үйлэдбэридэ үнэ сэн хазагайруулха талаар яһала олон ушарнууд тохёолдоно. Энээнһээ боложо, гүрэнэй мүнгэн һанда мүртэй мүнгэн оруулагданагүй.

Буряад Уласта ой модо хулгайлан отолжо, хямда сэнгээр түлхидэг ушарнууд бии гэжэ хэндэшье мэдээжэ. Ойн ажахынхид, ой соохи талмайнуудые түлбэритөөр ашаглагшад иимэ ябадалтай яажа тэмсэхэб гэжэ ойлгоногүй.

Тус суглаанда хабаадаһан Санкт-Петербург хотын уласхоорондын биржын хүтэлбэрилэгшэд тохёолдоһон байдалһаа гараха тухай ябадалнуудые ой модоной ажахынхидта дурадхаа. Нэгэниинь гэхэдэ, бүхы ой модоной зүйлнүүдые, ургажа байһан модо бургааһануудые биржэ дээрэ табижа, наймаа хэхэ тухай хөөрэжэ үгөө.

Суглаанда хабаадаһан Буряадай Толгойлогшо Алексей Цыденовэй хэлэһээр, биржэ дээрэ наймаалхада, яһала таатай хэрэг гээшэ. Ой модоной ажахын хүгжэлтэ шэнэ, бүри үндэр хэмжээндэ гараха аргатай. Тиихэдэ ой модоной ашаар мүнгэ олзоборилго алиньшье шатадань һайнаар хараатай байха юм.

- 2014 онһоо хойшо ой модо биржэ дээрэ наймаалжа эхилээбди. Сибириин тойрогто Красноярска хизаартай болон Эрхүү можотой нягта харилсаа холбоотойгоор хүдэлнэбди, - гэжэ Санкт-Петербург хотын уласхоорондын биржын таһагые даагша Станислав Мороз мэдүүлбэ.

Эрхүү можын ажахынууд ой модо биржэ дээрэ наймалалгада гараһандаа баяртай. Тэдэ бүри ехэ үнэ сэнгээр ой модоёо худалдажа, ехэ мүнгэ адхажа үзөө. Тиигэжэ тэдэ Буряадтахи дэбисхэр дээрэ оршодог ой модо отолжо буйлуулха түсэбтэй. Энэ ушараар ой модоной ажахынхидтай хэлсээ баталхаар бэлэн болонхой. Юуб гэхэдэ, тэдэ Буряадай Засаг газарһаа урид биржэ дээрэ гараха тухай дурадхал оруулһан байна бшуу. Иигэжэ эрхүүгэйхид Буряадһаа ой модо хямдаар гаргажа, үндэр үнэ сэнгээр биржэ дээрэ табиха һанаатай гэжэ олон сугларагшад суглаанай үедэ ойлгоо. Тиимэһээ бүридхэлдэ абтаһан 15 лесхозууд өөһэдын хүсөөр биржэдэ гарабалнь, һайн байгаа гээд һанагдана.

Мүнөө үедэ Буряадта модоной нэгэ гурбалжан метр 300 түхэриг хүрэнэгүй. Харин эрхүүгэйхид ойн модо биржэдэ табяад, 600 гаран түхэригөөр наймаална гээшэ.