​Һунгалтын онсо таланууд зүбшэгдэбэ

Интернет сүлжээнһээ гэрэл зураг абтаба

Буряад Уласай За­сагай газарта июлиин 27-до һунгалтада ха­баатай асуудалнуудые хараалһан зүблөөн үнгэрөө.

Удангүй, сентябриин 9-дэ дахинаа һунгалта болохонь гээд мэдэнэб­ди. Энэ удаа Буряад Уласай Арадай Хуралай һунгамалнуудые, мүн зарим нютагуудай бай­гууламжын депутаду­удые шэлэхэмнай. Ду­угаа үгэхэ эрхэтэй 700 мянганһаа үлүүтэй зон энэ хэмжээндэ оролсохо юм. Эгээл тиимэһээ эмхитэйгээр, журамтайгаар, хуулиин ёһоор һунгалта үнгэргэхын тулада мүнгэн һанһаа 150 сая түхэриг һомологдоно. 25 боложо хубаарһан 812 участо­гууд дуугаа үгэгшэдые хүлеэн абахаар бэлэн байха ёһотой гээд, Бу­ряад Уласай һунгалтын комиссиие ударидагша Дмитрий Ивайловский тэмдэглэнэ. Тиигэхын лэ тулада һунгалтада орол­сожо байһан бүхы намуу­дай гэшүүдые, өөрын ду­раар бэеэ мэдүүлэгшэдые, олондо мэдээсэл тараал­гын хэрэгсэлнүүдэй түлөөлэгшэдые болон бусад хабаадагшадые түхэреэн шэрээгэй дэргэдэ суглу­улжа, хөөрэлдөө эмхид­хэбэ. Һанамжаяа хэлэхэ, мэдээгүйгөө асуужа абаха арга боломжо энэ хэмжээ­нэй үедэ үгтөө.

Буряад Уласай феде­ральна ахамад инспек­тор Сергей Ромахинай һанамжаар, алибаа бүлэг зон хубиингаа, али бүри он­доо хүсэлөө хүсэлдүүлхэеэ һунгалтада оролсоно. Тиигэхэдээ бүхы талануу­дые элсүүлжэ, тэнсүүлжэ шадаха болобосорһон хүнүүд лэ үндэр тушаалда дэбжүүлэгдэхэ гээд най­дагдана.

12 һарын турша­да энэ болбол гурбада­хи һунгалтамнай бшуу. Тиимэһээ дүршэл бии. Үнэн мүрөөр, ёһо гурима­ар засагай түлөө тэмсэлгэ болохо аабза. Сентябри­ин 9-нэй удаа ажабайдал үргэлжэлһөөр гүб даа, - гэжэ Буряад Уласай Заса­гай газарай Захиргааниие ударидагша Баир Цыре­нов онсолон тэмдэглэбэ.

«Эрхэтэдэй талаһаа хиналта» гэжэ эблэлэй түлөөлэгшэ Олег Иван­ников энэ һунгалтада юу хүлеэмээр бэ гэһэн асу­удалда харюусаад тур­шаа. Тэрэнэй хэлэһээр, һунгагшад олоор хабаадахагүй. Шалтагаа­ниинь хадаа, һунгалтаһаа эсээшье, үрэ дүнгыеньшье мэдэрнэгүй хэбэртэй. Гүрэн доторхи полити­ческэ болон экономиче­ска байдалһаа хуу эхи­тэй. Илангаяа наһанай амаралтада гараха бол­зор саашалуулһан тухай, үндэһэтэнэй хэлэнүүд тушаа хуулинуудые хүн зон дуратайгаар хүлеэн абаа бэшэ ха юм. Уладай урмаа хухараад байһан үе сагта энэ һунгалта ёһо гурим соонь үнгэргэхэ түсэбтэйбди. Энэ хэрэ­гые Һунгалтын комисси, Олониитын палата, Хүнэй эрхэнүүдые хамгаал­гын талаар бүрин эрхэтэ түлөөлэгшэд хинан хараха болоно гүб даа.

Буряад Уласай Һунгалтын комиссиие уда­ридагша Дмитрий Ивайловскиин дуулгаһаар, һунгалтада хабаадаха ду­ратайшуул бултадаа бэеэ мэдүүлээд байна. Тэдэн мүнөө үнэмшэлгэ абахын тулада дансануудаа тушаанхай. Ерэхэ һунгалтада 12 намууд оролсоно... Ха­баадагша бүхэн адли эр­хэтэй гэхэ мэтэһээ эхилэ­эд, һунгалтын олон онсо талануудые ойлгуулһан һуралсал эмхидхэнэбди. Энэ хэмжээемнай зарима­шуул тооногүй.

Хүнэй эрхэнүүдые хамгаалгын талаар бүрин эрхэтэ түлөөлэгшэ Юлия Жамбалова баһал өөрынгөө һанамжа хэлэхэ­дээ, тойбо татангүйгөөр, хажуугаарнь эрьелдэжэ, энэ тэрэниие асарха ба­рихада туһатай байхын тулада волонтёрнуудые һунгалтын ажалда ха­баадуулжа эхилээбди гэбэ. Тиихэдэ участогу­удта комиссиин гэшүүн боложо гү, али ада­глан һууха түлөөлэгшэд бүридүүлэгдэнэ. Тэдэнэй дунда бүхы намуудай зүгһөө өөрын хүн байха ёһотой.

Ородой Холбоото Ула­сай Олониитын палатын гэшүүн Галина Горбатых үгэ абахадаа, иигэжэ онсо­лон тэмдэглэбэ:

Эрдэмдэг бэетэй зо­ной дуугаа үгэхөөр түхеэрэлгэнүүдые тохонхой 26 участок Буряадай дэ­бисхэр дээрэ тоологдоно. Иимэ арга боломжотой һэн тула Бүхэроссида түрүүшүүлэй жагсаалдабди.

Паспортын ёһоор, ажаһуудаг газартаа ду­угаа үгэжэ шадахагүй һаа, дүтынгөө участог­та хүрэжэ, 2 сагай тур­шада хүлеэгээд, эрхэтэн ябаһанайнгаа уялга бэе- лүүлмээр юм.

Буряад Уласай һунгалтын комиссиин урда ехэ харюусалгата ажал хүлеэнэ. Уласай хэмжээн­дэ һунгалта үнгэрдэг лэ ёһоороо үнгэрхэ. Харин нютагай байгууламжану­удта һунгалта яагаад эм­хидхэгдэхэб гэжэ һанаата боломоор. Юундэб гэхэ­дэ, энэ хэрэг бэелүүлхын тулада аяар 5 аймагта мүнгэн хараалагдаагүй. Тиихэдэ Буряад Уласай Арадай Хуралай 66 манда­дай түлөө 542 хүн урилда­жа байна.