803
Анна Огороднигой гэрэл зураг
Анха түрүүшынхиеэ Байгалай мэдээсэлэй хуралдаанай хэмжээндэ буряад хэлэн дээрэ бэшэдэг сурбалжалагшадай һургуули эмхидхэгдэһэн байна. Энэ хэмжээ ябуулга Буряадай гүрэнэй телевидениин хүтэлэгшэ сурбалжалагша, үндэһэтэн арадуудай журналистикын гильдиин хүтэлбэрилэгшэ Баярма Раднаевагай үүсхэлээр эмхидхэгдээ гэжэ тэмдэглэхэ шухала. Байгалай мэдээсэлэй хуралдаанай ажалда буряад хэлэн бэшэдэг, дамжуулгануудые бэлдэдэг сурбалжалагшад хабаадаа. Тиихэдэ аймагуудта буряад хэлэн дээр гарадаг сонинуудай редакторнууд ерэһэн байна.
Сарюуна Эрдынеевагай гэрэл зураг
Августын 3-да үнгэрһэн буряад хэлэн дээрэ бэшэдэг сурбалжалагшадай һургуулиин ажал 3 бүлэгһөө бүридөө. Түрүүшын «Телевидени, радио» гэһэн бүлэг Николай Шабаев, Дарима Жамсоева, Ольга Намдакова гэгшэд хүтэлбэрилөө. Мэдээжэ сурбалжалагшад өөрынгөө дүй дүршэлөөр хубаалдажа, ажалай үедэ ушардаг орёо асуудалнууд тухай хэлэбэ. Тиихэдэ Николай Чимитович залуу сурбалжалагшадай сэнхир дэлгэстэ гү, али радиодо гарадаг ушарнуудые жэшээ болгон харуулба. Буряадай гүрэнэй телевидениин буряад хэлэн дээрэ гарадаг программануудай редактор Дарима Жамсоева: “Бидэ буряад хэлэндэ һургаха бэшэ, харин анхарал татуулха зорилготойбди”, - гэжэ тэмдэглэһэн байна. Ольга Намдакова радиогой ажалтай танилсуулаа. Эндэ сугларагшад буряад хэлэн дээрэ хэмжээ ябуулга эмхидхэгдэһэнэй түлөө Баярма Дондоковнада баяраа мэдүүлээ.
Сарюуна Эрдынеевагай гэрэл зураг
Буряад Уласай, Ородой Холбооной соёлой габьяата ажал ябуулагша, хэлэ бэшэгэй эрдэмэй дид-доктор, мэдээжэ сурбалжалагша Туяна Самбялова үдын хойно һургуулиин ажал үргэлжэлүүлбэ. Туяна Владимировна “Буряад Үнэн” сониноо шүүмжэлжэ, аха үеын мэдээжэ уран зохёолшод, сэдхүүлшэдэй дүй дүршэл шудалан, ажалаа ябуулха тухай залуушуулда хэлэбэ.
Сарюуна Эрдынеевагай гэрэл зураг
Удаань буряад хэлэнэй орёо асуудалнуудаар филологиин эрдэмэй кандидат, доцент Бабасан Цыренов һуралсал үнгэргэһэн байна.
Сарюуна Эрдынеевагай гэрэл зураг
Хэмжээ ябуулгын түгэсхэлдэ эндэ сугларагшад нэгэ ажал хэнэбди гэжэ тэмдэглэн, хоорондоо нягта харилсажа, али орёо асуудалнуудаар зүбшэхэ тухай хэлсэбэ.
Сарюуна Эрдынеевагай гэрэл зураг
