​Олзын хэрэг эрхилэгшэдэй уулзалгаһаа

Улаан-Үдэ хотодо хоёр үдэрэй туршада Хитадай Үбэр Монголой болон Буряадай олзын хэрэг эрхилэгшэд уулзаба. Иимэ уулзалга хоёрдохи жэлээ Буряадай  худалдаа наймаанай-үйлэдбэриин палата эмхидхэнэ гээшэ.

Хитадай олзын хэрэг эрхилэгшэд хэмжээ ябуулгын үедэ хэдэн ажахынуудаар ябажа, ажабайдалтайнь танилсаа. Үбэр Монголой засагай газарай уласхоорондын худалдаа наймаа хүгжөөхэ таһагые даагша Ли Чжиминэй хэлэһээр, Буряадай ажахынууд һайн үрэ дүнтэйгөөр хүдэлнэ.

- Эдеэ хоол буйлуулдаг ажахынуудай байгаалиин сэбэр зүйлнүүдые ехээр хэрэглэхэдэнь һайшаалтай байна. Тиимэ хоол ехэ амтатай гэжэ ойлгообди. Мүн һүүлэй үедэ таарама технологическа онол арганууд хэрэглэгдэнэ, - гэжэ Ли Чжимин тэмдэглэнэ.

Буряадай худалдаа наймаанай-үйлэдбэриин палатын Юрэнхылэгшэ Петр Ертановай хэлэһээр, иимэ уулзалганууд хоёрдохиёо эмхидхэгдээ. Нүгөө жэл энэ хэмжээгээ бүри һонирхолтой болгожо, олон айлшадые угтан абахаар хараалнабди. Тиихэдээ Хитадай түлөөлэгшэдһөө гадна Монголой, Солонгосой болон Япон гүрэнэй олзын хэрэг эрхилэгшэдые хабаадуулхабди гэжэ Петр Ертанов тэмдэглэбэ. 

Авторай гэрэл зураг