822
Байгалай мэдээсэлэй хуралдаанай дүнгүүдээр Байгал шадарай аймагта Гремячинск һууринда августын 17-до суглаан үнгэргэгдэбэ. Энэ хэмжээ ябуулгада Ородой Холбоото Уласай 47 можо нютагуудай түлөөлэгшэд хабаадаа. Тэдэнэй тоодо Ородой Холбоото Уласай болбосоролой һалбари хинадаг албанай хүтэлбэрилэгшэ Сергей Кравцов болон Буряад Уласай Толгойлогшо Алексей Цыденов гэгшэд хабаадалсаа.
- Ородой Холбоото Улас дотор энэ хуралдаан ехэ удха шанартай. Хуралдаанай үедэ үхибүүдэй эрхын талаар этигэмжэтэ түлөөлэгшэ Анна Кузнецоватай хамта хүүгэдые хүмүүжүүлгын асуудалнуудаар ажалай бүлэг байгуулха тухай, болбосоролой шанар сэгнэхэ талаар уласхоорондын залан хүтэлбэрилгын зүблэл байгуулха тухай тусхай шиидхэбэринүүд абтаа. Эндэ болбосоролой шанар сэгнэдэг уласхоорондын PISA, TIMМS программануудай түлөө харюусадаг эрдэмтэд хабаадалсааа. Бултанай мэдэһээр, Ородой Холбоото Уласай Юрэнхылэгшын тогтоолоор, эрхим болбосоролтой 10 гүрэнэй тоодо Ород гүрэн оролсохо ёһотой. Тиимэһээ энэ асуудал Байгалай мэдээсэлэй хуралдаанда баһал хэлсэгдээ, - гэжэ Сергей Кравцов хэлэбэ.
Хуралдаанай үедэ Ородой Холбоото Уласай болбосоролой һалбари хинадаг албанай хүтэлбэрилэгшэ Сергей Кравцов уласай болбосоролой һалбаритай танилсажа, тэрэнэй булюу талануудые тэмдэглэһэн байна. Тэдэнэй тоодо ёһо заншал сахилга, хэшээлдэ бэлэдхэлэй методико, мүнөө үеын болбосоролой һалбариин эрилтэнүүдтэ таараһан һургуулинуудые барилга Сергей Кравцов нэрлэбэ.
- Тиигэбэшье шиидхэхэ асуудалнууд олон. Урагшаал дабшаха зорилготой эндэ суглараа ха юм бибди, - гэжэ Ородой Холбоото Уласай болбосоролой һалбари хинадаг албанай хүтэлбэрилэгшэ онсолбо.
Байгалай мэдээсэлэй хуралдаан ехэ удха шанартай, тэрэнэй үедэ улас доторой һургуулинуудта гурбадахи халаан, хүүгэдэй сэсэрлигтэ орохо ээлжээ усадхаха талаар хэлсээбди гэжэ Буряад Уласай Толгойлогшо Алексей Цыденов тэмдэглэбэ.
- Ородой Холбоото Уласай Болбосоролой яамантай энэ байдалаар хэлсээбди, эдэ асуудалнуудые шиидхэхэ талаар суг ажал ябуулхабди, - гэжэ уласай хүтэлбэрилэгшэ хэлэбэ.
Ородой Холбоото Уласай болбосоролой бодолгын асуудалнуудые зүбшэн хэлсэхэ гэжэ Байгалай мэдээсэлэй хуралдаан августын 15-да эхилээ гэжэ һануулнабди. Хуралдаанай үедэ 10-һаа дээшэ дүхэриг шэрээ, болбосоролой 7 талмай, аймагуудта болон Улаан-Үдэ хотодо нүүдэл суглаанууд, семинар, лекци, уулзалганууд эмхидхэгдээ.
Анна Огороднигой гэрэл зураг
