885
Буряад Уласай Толгойлогшо Алексей Цыденов августын 19-дэ албанай хэрэгээр Тарбагатай аймагаар ябахадаа, Пестерево һууринаар гаража, Большой Куналей хүрэтэр хэгдэһэн харгы нээлгын баяр ёһололдо хабаадаа. 8,6 модоной зайда «Аюулгүй, һайн шанартай харгынууд» гэһэн түсэлөөр харгы заһабарилагдаба.
Һайн харгытай болоһон ушарһаа, аймаг дотор аяншалгын һалбари улам хүгжэхэ гэжэ Буряад Уласай Толгойлогшо Алексей Цыденов тэмдэглэбэ.
- Ородой Холбоото Уласай эгээл һайхан һуурин гэжэ нэрлэгдэһэн Большой Куналей нютагта аяншалга улам хүгжэхэ. Тарбагатай аймагта жэлһээ жэлдэ харгынууд заһабарилагдажа, бүри һайн болохо. 2017 ондо түсэлэй хэмжээндэ 40 сая түхэриг һомологдоһон һаа, байгша ондо - 200 саяһаа дээшэ, 2019 ондо 240 сая түхэриг һомологдохо, - гэжэ уласай хүтэлбэрилэгшэ хэлэбэ.
8,6 модоной зайда харгы заһабарилгада 48,1 сая түхэриг һомологдоо. «Арт Ком» гэһэн эмхи харгы заһабарилжа, майн һүүлһээ аавгустын 17-до болзорһоо урид ажалаа дүүргэһэн байна.
2018 ондо «Аюулгүй, һайн шанартай харгынууд» гэһэн федеральна программаар Тарбагатай аймагта 26,8 модоной зайда харгы заһабарилагдаха. Заһабарилгын ажал 205,858 сая түхэригэй сэнтэй юм. Тиигэжэ Тарбагатай, Доодо Саянта, Дээдэ Саянта, Солонцы нютагуудта болон Большой Куналей, Дээдэ Саянта хүрэтэр ошоһон харгы заһабарилагдаха.
Буряад Уласай Засагай газарай хэблэлэй албанай гэрэл зураг
