754
Августын 19-дэ Буряад Уласай Толгойлогшо Алексей Цыденов албанай хэрэгээр Тарбагатай аймаг гараба. Үглөөнһөө уласай хүтэлбэрилэгшэ Тарбагатай аймагай түбэй больницын хүүгэдые эмнэлгын таһагта хүрэһэн байна. Хэдэн жэлэй саана энэ байшан эзэгүй, хаягдашаһан байгаа. Алексей Цыденовэй үнгэрһэн жэлдэ аймагаар ябахада, энэ байшанда ехэ заһабарилга хэхын тула мүнгэн дуталдана гэжэ Тарбагатай аймагай түбэй больницын ахамад эмшэн Александр Мацкевич хэлэһэн юм. Тиигэжэ Буряад Уласай «Элүүрые хамгаалгын һалбари хүгжөөлгэ» гэһэн программын хэмжээндэ 1,4 сая түхэриг һомологдоо. Удаань байшанай хушалта шэнэлэгдэжэ, заһабарилга хэгдээ.
- Буряад Уласай Засагай газарта баяраа мэдүүлнэбди, - гэжэ Александр Мацкевич хэлэбэ.
Удаань уласай хүтэлбэрилэгшэ Тарбагатай һууринай Казанка гэһэн газарта хүрэһэн байна. Анхандаа эндэ «Дружба» колхозой машинын хорой байһан юм.
- 15 жэлэй туршада Тарбагатайн ажаһуугшад стадионтой болохоёо хүсэдэг һэн. Хоёр жэлэй саана Буряад Уласай Хүдөө ажахын болон эдеэ хоолой яаманай «Хүдөө нютагуудай тогтууритай хүгжэлтэ» гэһэн программаар ажал ябуулагдажа, стадион баригдаа, - гэжэ Тарбагатай аймагай засаг даргын ниигэмэй хүгжэлтын талаар орлогшо Алексей Елизов хэлэбэ.
Эндэ барилга эхилхэдээ, стадион гэжэ түсэблэгдэһэн бэшэ юм, гансал гүйхэ харгы, тамирай талмай болон поли гэжэ хараалагдаһан юм. Теэд тэндэ трибуна хэгдэхэ боложо, энэ түсэл федеральна программаһаа гараһан байна. 2017 ондо стадионой барилга дүүргэхэ гэхэдэ, 11 сая түхэриг дуталдаа. Тарбагатай аймагай захиргаан Буряад Уласай Засагай газарта хандажа, зохихо шиидхэбэри абтаһан байна. Мүнөө стадиондо хэмэл хушалтаталай футбол наадаха поли, гар үмбэгэ, баскетбол наадаха талмай, хүнгэн атлетикын харгы баригдаа. Энэ барилгада 39 сая түхэриг гаргашалагдаа.
Тиихэдэ стадионой газар тамирай кластер гэжэ аймагай захиргаан бүридхэлдэ абаһан байна. Үбэлэй, зунай сагта эндэ зүг шэгээ элирүүлгын тамирай нааданууд эмхидхэгдэхэ, санаар ябаха бааза баригданхай. Тэрэшэлэн хубсаһаа һэлгэхэ, угаалдаха, хэрэгсэлнүүдээ хадагалха байшан баригдаха гэжэ түсэблэгдэнхэй.
- Үнгэрһэн жэлдэ аймагаар албанай хэрэгээр ябахадаа, ажаһуугшадтай уулзаһан байнабди. Шиидхэхэ асуудалнууд тухай ажаһуугшад хэлэһэн байна. Тэдэнэй нэгэн хадаа стадионой барилга, мүнөө эндэ ехэ ажал хэгдээ. Үнгэрһэн жэлдэ хэгдэһэн ажалай дүнгүүдые хараабди, шэнэ стадион, хүүгэдые эмнэхэ поликлиника нээгдээ. Һайн тээшэ хубилалтанууд бии, - гэжэ Буряад Уласай Толгойлогшо Алексей Цыденов хэлэбэ.
2017 ондо Тарбагатай аймагта соёлой-сүлөө сагаа үнгэргэлгын 3 түбтэ заһабари хэгдээ, 2018 ондо 4 түб заһабарилагдаа. Байгша ондо Доодо Саянтада шэнэ һургуули баригдажа эхилээ гэжэ уласай хүтэлбэрилэгшэ тэмдэглэбэ.
Буряад Уласай Засагай газарай хэблэлэй албанай гэрэл зураг
