![](/upload/resize_cache/iblock/a51/780_780_1/a51dbcf82125661aaf2401c964ccd7b9.jpg)
Түхэреэн сагаан Түгнын тэг дунда, Баян- Харын үбэртэ “Амарлин” дасан бодхоогдобо. Баясхалан ламын үүсхэһэн энэ буянта хэрэг олоной хүсөөр одоошье бүтэбэ. Эгээл тиимэһээ августын 19-дэ баярай найр үргэн хэмжээндэ үнгэрбэ.
Буряад Уласай засаг баригшад, Мухар-Шэбэрэй захиргаан, сомонуудай дарганар, илангаяа юрын зон энэ дасан барилгые ехэтэ дэмжэһэн байна. Мухар-Шэбэр аймагай болон Буряад Уласай хүндэтэ эрхэтэн Дамба Будаев, аймагай засаг дарга Владимир Молчанов, аймагай һунгамалнуудай Зүблэлые ударидагша Ольга Симухина гэгшэд баярай үгэнүүдые хэлээ. Тиихэдээ дасанай дэргэдэхи үзэсхэлэнтэ байгаали, Баясхалан ламын баян дэлгэр сэдьхэл гансата тэмдэглээ.
“Амарлин” дасанай дэргэдэ зүүн зүгэй ёһоор тамир тэнхээ һайжаруулгын түб саашадаа байгуулагдаха юм. Багашуулые иимэ шэглэлээр хүмүүжүүлхэ шухала гээд, Баясхалан лама бододог гээшэ. Тиимэһээ дасан нээлгын ёһололдо тхэквондогоор бэеэ һоригшод, мүн ушугай федерациин гэшүүд хаба шадалаа олоной урда харуулһаниинь гайхалгүй.
Тиихэдэ нютагай бэлигтэн, тэрэ тоодо Боомой болон Нарһатын эдиршүүл, Буряадай дуури, бүжэгэй театрай түлөөлэгшэд: Александр Хандажапов, Александр Саможапов гэгшэд һайхан тоглолто харуулаа.
Наратай сэлмэг үдэр тудажа, тунга ногоон хүнжэлөө дэлгээһэн Түгнын талада ая гангын хангалтай Баян-Харын хойморто “Амарлин” дасан нээлгын ёһолол дулаахан оршондо үнгэржэ байгаа бэлэй... Түгнөөрхиндөө туһатай Баясхалан ламадаа баяр талархалаа мэдүүлэе!
Авторай зүгһөө
Түгнын талада буряадуудай байрлаһан сэлеэн нютагуудые холбоһон харгы хэзээшье болбосон түхэлтэй болохо ааб гэжэ тэсэн ядан хүлеэгшэ бэлэйб. “Амарлин” дасан нээлгын ёһолол руу ошожо ябахадаа, һайн харгы хэрэггүй гэжэ бодооб. Энэ хэбээрээ Түгнымнай талын хэтэ мүнхэдөө үлэхын тулада олондо дэбһүүлһэнэй хэрэггүйл даа!
Авторай гэрэл зурагууд
Автор: Сарюуна ЭРДЫНЕЕВА