832
Буряад Уласай Толгойлогшо Алексей Цыденов «Аюулгүй, һайн шанартай харгынууд » гэһэн Юрэнхылэгшын түсэлөөр заһабарилагдаһан харгынуудые шалгаба. Уласай хүтэлбэрилэгшэ Улаан-Үдын 100-дахи кварталнууд болон Вахмистрово хүрэтэр заһабарилагдаһан харгынуудые шалгажа, гэрнүүдые уһанда абтахагүй талаар хэмжээнүүдые абаха тухай хэлэбэ.
Буряад Уласай Транспортын, элшэ хүсэнэй болон харгын ажахы хүгжөөлгын яаманай, Улаан-Үдын захиргаанай, “Улан-Удэстройзаказчик” эмхиин түлөөлэгшэд харгынуудые шалгалтада хабаадалсаа. Тиихэдэ гэрнүүдэй уһанда абтахагүйн тула ганса Вахмистроводо бэшэ, үшөө 100-дахи кварталнуудта асуудалнуудые шиидхэхэ хэрэгтэй гэжэ Алексей Цыденов тэмдэглэбэ.
- 2013 ондо абтаһан түсэлөөр ажал хэгдэбэ. Тиихэдэ эндэ гэрнүүд үгы байгаа. Мүнөө түсэлдэ заһабари оруулха хэрэгтэй. Хойто жэл ажал дахин хэхэгүйгөөр, мүнөө уһанай урадхал шалгаха хэрэгтэй, - гэжэ уласай хүтэлбэрилэгшэ хэлэбэ.
Тиихэдэ ажал һайн шанартайгаар хэгдэхэ ёһотой гэжэ Алексей Цыденов онсолбо.
“Хэгдэһэн ажал һайн шанартай байха ёһотой. Харгын ашаглалгада тушаалгада бидэ ерэжэ, шанарынь шалганабди. Алдуунуудай байбал, харгы барилгашад тэдэнээ заһаха аргатай”, - гэжэ Буряад Уласай Толгойлогшо тэмдэглээ.
Хуби ниилүүлһэн нээмэл «Дорстройсервис» бүлгэмэй түлөөлэгшэ Елена Хантаевагай хэлэһээр, асфальтбетоной шанар шалгагдана. Барилгын ажал 2018 оной октябрь һарад дүүрэхэ.
Улаан-Үдын Орловская гудамжада, Тарбагатай аймаг ошоһон 0-8 модоной зайда харгын заһабарилга 2017 ондо эхилһэн юм. Орловская гудамжада харгы заһабарилгын хоёр шатада 322,5 сая түхэриг һомологдоо. Горький һууринай түмэр харгыһаа 111-дэхи микрорайон хүрэтэр 4 зуруудтай харгы 2017 ондо ашаглалгада тушаагдаа. Тиихэдэ 3,8 модоной утатай велосипедээр ябаха харгы, 3,6 модоной зайда тротуарнууд хэгдээ.
Тарбагатай аймагай 8 модоной утатай зайда харгын заһабарилгын сэн 409, 7 сая түхэриг болоһон байна.
Анна Огороднигой гэрэл зураг
