1109
Буряад Уласай Толгойлогшо Алексей Цыденов албанай хэрэгээр Хойто-Байгалай аймаг гаража, Нижнеангарск һууринда хизаарламал харюусалгатай «БайкалНедраГео» бүлгэмэй барижа байһан баазада хүрэбэ.
- Хойто-Байгалай аймагта минеральна үтэгжүүлгэ олзоборилогдохо. Нөөсэнүүдэй хэбтэшэнь зуугаад жэлдэ хүрэхэ. Тиихэдэ эндэ олзоборилогдохо минеральна үтэгжүүлгэ шанараараа дэлхэйдэ эгээл һайн, - гэжэ Алексей Цыденов хэлэбэ.
Хойто-Байгалда бүридхэлдэ абтаһан энэ бүлгэм Сынырское уурхайн хэбтэсэ шэнжэлхэ, олзоборилхо үнэмшэлгэ 2017 абаһан байна. Мүнөө Нижнеангарск һууринда барилга хэгдэнэ. Эндэ хүдэлмэрилэгшэдэй байрлаха зошод буудал, гараж, бокснууд баригдана. Баазын һууринай барилга эхилэнхэй, Новый Уоян һууринһаа уурхай хүрэтэр түхэреэн жэлдэ ашаглагдаха 120 модо утатай харгы баригдана. Левая болон Правая мама голнууд дээгүүр хүүргэ баригдаха гэжэ этүсэблэгдэнхэй. Барилгын ажалда 400 сая түхэриг һомологдоо. Энэ үйлэдэридэ мүнөө далаад хүн хүдэлмэрилнэ.
- Энэ хадаа онсо шухаг үйлэдбэри. Саашадаа Буряад уласта эгээл ехэ хэмжээнэй минеральна үтэгжүүлгэ эндэ олзоборилогдохо, - гэжэ «БайкалНедраГео» бүлгэмэй ахамад главный геолог Дмитрий Иванов тэмдэглэбэ.
Удаань Буряад Уласай Толгойлогшо хоёр аллейдэ хүрэһэн байна. «Болбосон түхэлтэй хотын оршон байгуулга» гэһэн федеральна түсэлөөр Нижнеангарск һууринда БАМ-ай барилгашадай аллей баригдаа. БАМ-ай барилгашадай аллейдэ гэрэлтүүлгэ хэгдээ, һандалинууд, бог шорой суглуулха һабанууд табигдаа, хүүгэдэй талмайнууд байгуулагдаа. Эдэ ажалнуудта 1,1 саяһаа дээшэ түхэриг һомологдоһон байна.
«Хойто Байгалай домогууд» гэһэн аллей нээлгын баяр ёһололдо Алексей Цыденов хабаадалсаа. Хойто-Байгалай аймагта археологиин 50-һаа дээшэ хүшөө олдоһон байна. Эдэ газарнуудта хүнүүдэй анхан ажаһууһан, хүдөөлһэн тэмдэгүүд элирүүлэгдээ. Түүхын, археологиин, палеонтологиин баримтада үндэһэлэнгүй, «Хойто Байгалай домогууд» гэһэн аллей байгуулагшад Буряад уласта урда сагта ажамидарһан динозавр, мамонтонуудай зурагуудые үзэсхэлэндэ дэлгэбэ. Хойто-Байгалда аяншалагшадай тоо олошорһон ушарһаа, энэ экспозици тэдэндэ бэлдэгдээ.
- Мамонтнуудай үлэгдэлнүүдтэ зорюулагдаһан хүшөө наһандаашье мартагдахагүй. Хойто-Байгаллай аймагта хүргэнүүд ашаглалгада тушаагдана. ФАП баригдана, хүүгэдэй амбулатори нээгдэбэ. Байдал бага багаар лэ хубилна, урагшаа тэгүүлнэбди, - гэжэ Буряад Уласай Толгойлогшо Алексей Цыденов тэмдэглэбэ.
Буряад Уласай Засагай газарай хэблэлэй албанай гэрэл зураг
