1181
Буряад Уласай Толгойлогшо Алексей Цыденов албанай хэрэгээр Хойто-Байгалай аймагаар ябахадаа, Нижнеангарскын түбэй больницын хүдэлмэригшэдтэй уулзаһан байна.
- Нижнеангарскын түбэй больницада «КамАЗай» баазада флюорограф, маммограф хэрэгсэлнүүдээр тохогдоһон машина дамжуулха тухай хэлсээбди. Мэргэжэлтэд холо оршодог хүдөө нютагуудта гаража, ажаһуугшадта эмнэлгын туһа хүргэхэ. Иимэ «КамАЗ» байна, тэрэниие хэрэгсэлнүүдээр хангаха үлэнхэй, - гэжэ уласай хүтэлбэрилэгшэ тэмдэглэбэ. Тиихэдэ Буряад Уласай Толгойлогшо Алексей Цыденов больницануудта ехэ заһабари хэхэ асуудалаар зүбшэбэ. Хойто жэлдэ Новый Уоян больницада ехэ заһабари хэгдэхэ.
Удаань уласай хүтэлбэрилэгшэ аймагай залуушуул, һомонуудай, агнууриин ажахын хүтэлбэрилэгшэд болон агнуушадтай уулзаба.
Алексей Цыденов «Ангара» болон Нижнеангарскын аэропортнуудай хүтэлбэрилэгшэдтэй уулзажа, хойто жэлдэ «Улаан-Үдэ-Нижнеангарск» замаар самолёдоор ниидэхэ асуудалнуудаар зүбшэбэ.
Тиихэдэ Буряад Уласай Толгойлогшо Нижнеангарск һууринда «Үмхирһэн, аюултай болоһон гэрнүүдһээ зөөлгэ» гэһэн программаар баригдажа байһан талмайда хүрэһэн байна. Эндэ барилгашад 50-лет Октября гудамжын 16,18-дахи гэрнүүд шадархи талмай болбосон түхэлтэй болгожо, хүүгэдэй талмай барина. Энэ барилгада аймагай бюджетһээ - 450 мянган түхэриг, уласай бюджетһээ 110 мянган түхэриг һомологдоо. Тиихэдэ тамирай тоног хэрэгсэлнүүд худалдан абтанхай.
Мүнөөдэр, августын 24-дэ, Буряад Уласай Толгойлогшо Алексей Цыденов Северобайкальск хотын ниигэмэй удха шанартай эмхинүүдтэ хүрэжэ, Северобайкальск хотын ажаһуугшадтай уулзаха юм.
Буряад Уласай Засагай газарай хэблэлэй албанай гэрэл зураг
