884
Буряад Уласай Толгойлогшо Алексей Цыденов албанай хэрэгээр Северобайкальск хото гаража, нэгэ халаанда 275 һурагшадые багтааха Заречный микрорайоной шэнэ 3-дахи һургуулида хүрэбэ.
- Мүнөө үеын һургуулиин нээгдэһэн баяраар Северобайкальск хотын ажаһуугшадые амаршалнаб. Эндэ эдеэ хоол бэлдэхэ газар, тамирай танхим, компьютерна болон тусхай хэрэгсэлнүүдээр хангагдаһан англи хэлэнэй һаруул классууд. Шэнэ гоё һургуулида һурагшадай амжалтанууд улам дээшэлүүлэгдэхэ, - гэжэ уласай хүтэлбэрилэгшэ Алексей Цыденов хэлэбэ.
«2009-2018 онуудта Ородой Холбоото Улас дотор газарай хүдэлөөнэй аймагуудта гэрнүүдэй, ажабайдалай шухала объектнүүдэй тогтуури дээшэлүүлгэ» гэһэн федеральна программаар болбосоролой эмхи баригдаба. 2014 ондо «Атлант» бүлгэм барилга эхилжэ, 2015 он болотор һомологдоһон 200 сая түхэригэй оройдоол 12 сая түхэриг хэрэглэжэ шадаа. Тиимэһээ энэ бүлгэмтэй хэлсээн болюулагдаа. Удаань «Буряад Уласай Засагай газарай Ехэ заһабариин хүтэлбэри» гэһэн эмхи барилга ябуулһан байна. 2015 оной декабрь һарада хуби ниилүүлһэн нээмэл «Промгражданстрой» бүлгэмтэй хэлсээн баталагдаа.
2017 оной декабрь һарада Северобайкальск хотын захиргаан һургуули ашаглалгада тушааха зүбшөөл үгэжэ, байгша оной апрелиин 21-дэ һургуули нээлгын баяр ёһолол үнгэргэгдөө. Шэнэ һургуулида 192 һууритай актова заал, 138 һууритай халуун эдеэ бариха газар, тамирай танхим баригдаа. 2018-2019 һуралсалай жэлдэ шэнэ һургуулида 250 үхибүүд һураха. Тиихэдэ нэгэ халаанда энэ һургуулида 275 шабинар һураха аргатай.
- Шэнэ томо һургуулида һурагшад нэгэ халаанда һураха. Бидэ Улаан-Үдэдэ гурбадахи халаан усадхаха талаар асуудалнуудые шиидхэнэбди. Тиихэдэ нэмэлтэ һуралсалай хэмжээ ябуулганууд хэшээлнүүдэй һүүлээр эмхидхэгдэхэ, - гэжэ Буряад Уласай Толгойлогшо Алексей Цыденов хэлэбэ.
Буряад Уласай Засагай газарай хэблэлэй албанай гэрэл зураг
