1091
Буряад Уласай Толгойлогшо Алексей Цыденов албанай хэрэгээр Муя аймаг гаража, нютагай засагай байгууламжын хэдэн асуудалнууд шиидхэгдэбэ. Тэрэнэй тоодо, Таксимо һууринай үмхирһэн, хооһон гэрнүүдые задалха тухай хэлсээ.
- Хойто аймагуудта шиидхэхэ асуудалнууд бэлэн бэшэ. Муя аймагта гэр байрын ажахын асуудалнууд үнинэй шиидхэгдээгүй. Таксимо һууринай үмхирһэн, хооһон гэрнүүдые задалха хэрэгтэ мүнгэ һомолхо тухай шиидхэбэри абтаа, - гэжэ Буряад Уласай Толгойлогшо Алексей Цыденов хэлэбэ.
Тиихэдэ Таксимо хүрэтэр харгы болбосон түхэлтэй болгохо тухай шиидхэбэри абтаа.
- Олониитын транспорт һуурин дотор үгы. Тиимэһээ һуурин соогуур гараха нэгэшье автобуса табиха тухай хэлсээбди, - гэжэ уласай хүтэлбэрилэгшэ дуулгаба.
Удаань уласай хүтэлбэрилэгшэ Таксимо һууринай котельнидэ хүрэжэ, тэрэнэй хүдэлмэрилэгшэдтэ үнгэрһэн дулаасуулгын хаһын салингыень октябрь һара болотор түлэхэ тухай мүнгэ һомологшотой хөөрэлдэбэ.
Буряад Уласай Толгойлогшо Алексей Цыденов албанай хэрэгээр Муя аймагаар ябахадаа, элүүрые хамгаалгын эмхинүүдтэ хүрэжэ, хүдэлмэрилэгшэдтэйнь уулзаба. Эдэ эмхинүүдые хуби ниилүүлһэн нээмэл «РЖД» бүлгэмһөө худалдан абаха тухай шиидхэбэри абтаһан байна. Удаань уласай хүтэлбэрилэгшэ Муя аймагай ажаһуугшад болон эдэбхитэдтэй уулзаа.
Буряад Уласай Засагай газарай хэблэлэй албанай гэрэл зураг
