​Тоогой системэдэ шэлжүүлэгдэнэ

2019 оной эхиндэ Ородой Холбоото Уласай дэбисхэр дээрэ бүхы телерадио дамжуулганууд тоогой (цифровой) системэдэ оруулагдахань.

Тиигэжэ мүнөө харуулагдажа байһан теледамжуулга 100 мянганһаа үсөөн ажаһуугшадтай нютаг газарну­удта болюулагдаха. Буряад Уласай 162 нютагуудта тоогой холбоон ябуулаг­даха аргагүй һэн тулада, спутниково телевидени байгуулагдаха. Социальна талаар хамгаалагдаха хүн зондо дэмжэлтэ үгтэхөөр хараалагдаха.

2016 оной декабрь һараһаа Буря­ад Улас дотор түрүүшын мультиплекс холбоон ябуулагдана, тэндэ 10 теле­программа болон 200 радиохолбоон газараар дамжуулагдана. Хоёрдохи мультиплекс байгша оной декабрь һара соо ябуулагдажа эхилхэ. Газараар дамжуулдаг цифровой холбоон Буряад Уласай 458 нютагаар ябуулагдаха арга боломжотой.

Тээбэриин, элшэ хүсэнэй болон хар­гын ажахын сайдай орлогшо Алексей Назимовай мэдээсэһээр, Буряад Уласай ажаһуугшадай 97,4 хубинь цифровой холбоондо оруулагдаха.

- Декабрь һараһаа хүн бүхэн 20 ка­нал болон федеральна гурбан радио­станци шагнаха аргатай. Цифровой телевиденидэ холболдохо гэбэл, тус­хай хэрэгсэл худалдажа абаха хэрэгтэй. Үгы гэбэл, DVB-T2 гэһэн дохёо абаха аргатай телевизорнүүд хэрэгтэй, - гэжэ тэрэ тайлбарилба.

Буряад Уласай РТПЦ–гэй эмхиин за­хирал Виктор Багрецовой мэдээсэһээр, тиимэ хэрэгсэлнүүд элбэгээр олдохо.

- Тусхай наймаануудта аяар 50 ян­зын приставканууд дурадхагдана. Тиимэшье үнэ сэнтэй бэшэ, мянгаад лэ түхэригтэ, гэхэ зуура, 2015 онһоо үйлэдбэрилэгдэһэн телевизорнүүд иимэ холбоотой байдаг юм. Тиимэһээ эртээнһээ һанаата боложо, холбоо дам­жуулха хэрэгсэлнүүдые абаха шухала, шэнэ жэлһээ бэрхэшээлнүүд бии боло­хо бшуу, - гэжэ Виктор Багрецов хэлэбэ.

НТВ+ болон Триколор гэһэн спутни­кова эмхинүүд Буряад Уласай захирга­антай хэлсээ баталжа, түлбэригүйгөөр дамжуулга хараха аргатай болохо.

- Ямар нютаг газарнууд энэ холбо­ондо орохо аргатай гээшэб гэжэ манай сайт руу ороод, шалгажа болоно. Газараар дамжуулдаг холбоогоор Буряад Уласай 25 мянгаад зон лэ хараха аргагүй болоно. Приставка хямдаар абаха гэбэл, 4,5 мянгаар дурадхагдана, харин холбоо таталгань 1,5 мянгата болохо юм, - гэжэ Алексей Назимов мэ­дээсэбэ.

Энэ цифровой холбоон тухай 58-58- 09 гэһэн утаһаар хонходожо, дэлгэрэн­гы мэдээ абахада болоно.