​​Хоорондоо эб ехэтэй Хориин багшанар урматай

Һуралсалай шэнэ хаһын үмэнэ багшанарай хуралда­ан үнгэрдэг. Августын 24-дэ Хориин түб тосхоной Со­ёлой ехэ ордон дотор һуралсалай һалбариин бүхы түлөөлэгшэд сугларжа, туйлалтануудаа тэм­дэглээ, урдахи зорилгонуудаа ха­раалаа. Гадна ажал хэрэгтээ онсо илгарһан зондо шангууд барюу­лагдаа.

ҮХИБҮҮДЭЭ УГТАХААР БЭЛЭН

Хориин дэбисхэр дээрэ 17 һургуули, 13 сэсэрлиг, нэмэлтэ һуралсалай 3 эмхи тоологдоно гээд, аймагай засаг дарга Юрий Шираб­доржиев дуулгаба. Гүрэнэй эдэ эмхинүүдтэ ажал хэрэгээ олон жэл­дэ оролдосо ехэтэйгээр хэжэ ябаһан багшанарта, хүмүүжүүлэгшэдтэ Оро­дой Холбоото Уласай, Буряад Уласай болоод аймагай хэмжээнэй шагнал­нууд барюулагдаа.

Хориин 2-дохи һургуулида бу­ряад хэлэ табадахи жэлээ амжалта түгэс заажа ябаһан Эржена Жиг­митова Хори аймагай нютагай бай­гууламжын Хүндэлэлэй грамотада хүртэһэндөө ехэ урматай. Эрхүүгэй ехэ һургуули түгэсэжэ ерээд, айма­гай түб тосхондо багшалжа эхилһэн.

Үндэһэн хэлэнүүд тухай хуулида хубилалтанууд оруулагдабашье, манай һургуулида 5-дахиһаа 11-дэхи анги хүрэтэр бүхы үхибүүднай саашадаа буряад хэлээ шудалха дуратай байһанаа мэдүүлээ, - гээд, Эржена Га­лановна хэлэбэ.

Тиихэдэ баһал буряад хэлэнэй багша болохо Зоригма Цыбикова Буламай юрэнхы һуралсалай дунда һургуулиин захиралаар хоёрдохи жэ­лээ хүдэлжэ байна.

Һуралсалай шэнэ хаһада бэлдэн­хэйбди. Бүхы шалгалтануудаа гаранхайбди, - гээд, Зоригма Баировна ур­матайгаар тэмдэглэбэ.

Тиихэдэ аймагай засаг дарга Юрий Ширабдоржиевай мэдүүлһээр, аймагай һуралсалай бүхы эмхинүүд сентябриин 1-дэ үүдээ сэлин, үхибүүдээ угтахаар бэлэн болонхой. Зунай сагта заһабарилгын ажалнууд дүүрэн хэгдээ, шалгалтанууд гүйсэд гарагдаа бшуу.

ДҮРШЭЛ ЕХЭТЭЙ БАГШАНАРАА ХҮНДЭЛЭН

Хори аймагай һургуулинуудта энэ удаа 6 шэнэ багшанар ажалайнгаа намтар эхилбэ. Залуу багшанарые урмашуулан, аймагай захиргаан 25 мянган түхэриг барюулаа.

Буряадай гүрэнэй ехэ һургуули болоод багшанарай колледж түгэсхэһэн мэргэжэлтэд Хориин баг­шанарай дүхэригтэ оробо бшуу. Хэд бэ гэхэдэ, Анжелика Бальчиндоржи­ева, Туяна Жимбэжамсуева, Марина Дампилова, Татьяна Рассадина, Ли­дия Красикова, Буян-Долгор Цыбе­нова мүн.

Тиихэдэ аймагай захиргаан дүршэл ехэтэй ветерануудаа баһал амаршалаа. 39 жэлдэ Хориин 1-дэхи һургуулида багшалжа ябаһан Та­тьяна Арефьева, энэл һургуулида 34 жэлдэ хүдэлжэ байһан Виктория Чимитова, 38 жэлдэ Зун-Хурайн һургуулида тоо бодолго заажа ябаһан Любовь Благодарова, 40 жэлдэ Хасууртын һургуулида ород хэлэ зааһан Наталья Казазаева гэг­шэд баһал үнэтэ бэлэгүүдтэ хүртөө бшуу.

Баир Борбоевой гэрэл зурагууд