​​Зандинай дуганай дэргэдэ – мориной соло

Августын 25-да болоод 26-да Мухар-Шэ­бэрэй Зандинай дуганда Чойжол сахю­усанай дүрын рамнай үнгэрөө. Удаань эрын гурбан наадан үндэр хэмжээндэ эмхидхэгдэһэн байна.

Мори урилдаагаар энэ мүрысөөн Суулгын со­вхозой нэгэдэхи таһагай хүтэлбэрилэгшэ байһан Чимит Дабажалсановай мүнхэ дурасхаалда зорюулагдаа. Эртэ үглөөнһөө холо ойрын элдэб аймагуудһаа хүнгэн хүлэгүүд Түгнын талада су­глараа.

Хэр угһаа Монгол туургата арадуудта морин гээшэ эгээл хүндэтэй, нангин амитан байһан юм. Зунай энэ үдэр морин эрдэниингээ соло дуудажа, һүр һүлдыень дээрэ үргэжэ байхадамнай ехэ уд­хатай гээд, Буряад Уласай габьяата һоригшо Олег Цыдыпов тэмдэглээ.

Зандинда анха түрүүшынхиеэ эмхидхэгдэһэн мори урилдаан Чимит Дабажалсановай мүнхэ ду­расхаалда зорюулагдаһаниинь дэмы бэшэ. Юуб гэхэдэ, энэ хүн үнэн сэхэ, ажалша бэрхэ, түрэл ню­тагтаа аргагүй дуратай, шуран шударгы байһан юм гээд, нютагаархид дурсана.

Түгнын энэ талада үй түмэн моридой та­хын түбэрөөн үшөөл сууряатан дуулдаха бай­ха. Иимэ мүрысөөн заншалта боложо, жэл бүри үнгэргэгдэхөөр хараалагдана.

Тиихэдэ Түгнэ-Галтайн дасанда 12-дохи уда­агаа Ганжуур хурал сентябриин 6-һаа гурбан үдэрэй туршада хурагдахань. Сентябриин 8-да Бандида Хамба лама Дамба Аюшеевэй хабаадал­гатайгаар энэ буянта үйлэ хэрэгтэ зорюулагдаһан гол хэмжээнүүд үнгэрхэ. Шэнээр һэргээгдэһэн дасан дотор Будда бурханай 108 хүрэг болоод да­санай алтан ганжар арамнайлагдаха. Удаань эрын гурбан наадан үнгэрхэ. Энэ хэмжээндэ олоороо оролсыт гээд, эмхидхэлэй хороон уряална.

Дашима ЦЫДЫПОВА

Владимир Шираповай гэрэл зурагууд