1083
Сентябриин 1-нэй үдэр Улаан-Үдын 112-дохи микрорайондо 1500 һууритай 63-дахи һургуули нээлгын баяр ёһолол үнгэргэгдэбэ. Энэ һургуулида гурбадахи халаан усадхагдажа, һурагшад хоёр халаанда һураха юм.
Буряад Уласай Толгойлогшо Алексей Цыденов, Улаан-Үдэ хотын засаг дарга Александр Голков, болбосоролой болон эрдэм ухаанай сайд Баир жалсанов, 63-дахи һургуулиин захирал Батор Лудупов, эхэнэрнүүдэй дунда шатар наадаар гроссмейстер Инна Ивахинова гэгшэд һургуули нээлгын баяр ёһололдо хабаадаа.
Уласай хүтэлбэрилэгшэ һурагшадые, багшанарые, түрэлхидые һуралсалай шэнэ жэлээр амаршалба.
- Һургуулидаа ерэһэн һурагшад, таанар, шэнэ нүхэдтэй болонот, ажабайдалтнай хубилна. Би танда бага зэргэ атаарханаб. Һургагшад, илангаяа нэгэдэхи ангинуудай шабинар, һуралсалай бүхы жэлнүүдтэ һайндэрэй оршондо һурахыетнай хүсэнэб. Ахалагша ангинуудай һурагшад, һайнаар һуража, багшанараа хүндэлжэ, түрэлхидэйнгээ үгэ дуулажа, ажабайдалай үргэн харгыда бата бэхеэр алхалан ябахыетнай хүсэнэб. Уужам, һаруул шэнэ һургуулида эрхимээр һураха аргатайт. Бултандатнай һайн һайханиие хүсэнэб, - гэжэ Алексей Цыденов сугларагшадта хандаба.
- Хүндэтэ багшанар, түрэлхид, һурагшад! Мүнөөдэр үнинэй хүлеэгдэһэн шэнэ һургуули нээгдэбэ. Манай шатарай һургуулиин таһаг 112-дохи микрорайондо ажалаа ябуулха. Урма баяртай, үнэн сэхэ нүхэдтэй, һуралсалдаа амжалтатай ябахыетнай бултанда хүсэнэб, - гэжэ эхэнэрнүүдэй дунда шатар наадаар гроссмейстер Инна Ивахинова хэлэбэ.
63-дахи һургуулиин шэнэ байшанда тамирай хоёр танхим, актова заал, мастерскойнууд, номой сан, эрэмдэг бэетэй үхибүүдэй һураха тусхай хэрэгсэлнүүдээр хангагдаһан кабинедүүд бии. Энэ һургуулида эрэмдэг бэетэй 53 үхибүүн мүнөө жэлһээ һураха.
Алексей Цыденовэй хэлэһээр, инклюзиин һуралсал үнгэргэхэ талаар, хэрэгсэлнүүдээр хангагдаһан кабинедүүд болон багшанар ажалаа ябуулхаар бэлэн.
- Эрэмдэг бэетэй үхибүүд һургуулидаа, класс соогоошье айнгүй, эшэнгүй, бусад һурагшадтай эбтэй, эетэй байхын тула ажал ябуулха хэрэгтэй. Шэнээр баригдажа байһан һургуулинуудта эрэмдэг бэетэй үхибүүдэй һураха аргатай байхын талаар техническа талаһаа арга боломжонууд хараалагдаха, - гэжэ уласай хүтэлбэрилэгшэ тэмдэглэбэ.
Буряад Уласта һургуулинуудые бариха түсэбүүд тухай Алексей Цыденов хэлэбэ.
- Буряад Уласай һургуулинуудта гурбадахи халаан усадхаха талаар һүүлэй хоёр жэлдэ 8 һургуули баригдаха. Мүнгэнэй талаар асуудалнууд шиидхэгдээ. Ород гүрэнэй Засагай газарай Түрүүлэгшэ энээниие дэмжэһэн байна. Мүнөө бюджедэй түсэлдэ һургуулинуудые барилга хараалагданхай, түсэблэлгын-гаргаша тоололгын дансанууд бии. Доодо Саянтада һургуули бариха талаар ажал ябуулагдана. Автотранспортная гудамжада мянган һууритай томо һургуули баригдаха. Эдэ һургуулиинууд мүнөө үеын эрилтэнүүдтэ тааруу байха, - гэжэ Алексей Цыденов хэлэбэ.
Анна Огороднигой гэрэл зурагууд
