900
Сентябриин нэгэнэй үдэр Буряад Уласай бүхы һургуулинуудта түрүүшын хонхо зэдэлжэ, һурагшад хэшээлнүүдтэ тэгүүлбэд.
Байгша ондо Буряадай һургуулинуудта 140 242 шабинар һураха, тэдэнэй 16 мянганһаа дээшэниинь һургуулиин богоһо анха түрүүшынхиеэ алхажа оробо.
Нютагай засагай байгууламжын болон гүрэнэй комиссинууд түймэрэй хиналтын гүрэнэй албантай хамта Буряад уласай 462 болбосоролой эмхинүүд һуралсалай шэнэ жэлдэ бэлэн гэжэ шиидхэбэри абаа. 2018 оной июниин 5-һаа августын 15 болотор комиссиин гэшүүд һургуулинуудта шалгалта үнгэргөө.
Мүнөө жэлһээ Буряад Уласай бүхы һургуулинуудта вахтёрнууд хүдэлхэ юм. Һургуулинуудые вахтёрнуудаар хангаха хэрэгтэ нютагай засагай байгууламжануудай бюджедтэ 90,6 сая түхэриг һомологдоо. 2018 оной апрель һарада һургуулинуудай вахтёрнуудта эрилтэнүүд баталагдаһан байна. Гэнтын аюулай болобол, ямар хэмжээ абахаб гэһэн гурим абтаа, бүхы аймагуудта туһа хүргэхэ албануудта хандаха утаһанууд согсологдоһон байна.
Тиихэдэ аюулгүй байдал сахиха талаар һурагшадай, һургуулиин хүдэлмэрилэгшэдэй хуули, эрхэ хазагайруулһан ушарнууд тухай мэдээсэл суглуулха хайрсагууд тохогдоо. Гэнтын аюулай болобол, ямар хэмжээ абахаб тухай һануулһан булангууд шэнэлэгдээ.
Болбосоролой эмхинүүдтэ эмнэлгын туһа хүргэхэ талаар Буряад Уласай элүүрые хамгаалгын яаманай үнэмшэлгын таһагай мэдээсэһээр, уласай 462 һургуулинуудһаа 344-ниинь үнэмшэлгэтэй эмнэлгын танхимуудтай. Уласай 118 һургуулида фельдшерскэ-акушерскэ пунктнууд болон амбулаторинуудта эмнэлгын туһа хүргэгдэхэ юм.
2018-2019 һуралсалай жэлдэ 238 автобусаар үхибүүдые һургуулидань хүргэхэ.
Һуралсалай шэнэ жэлдэ 1-дэхиһээ 11-дэхи анги хүрэтэр һурагшад номуудаар хангагдаа. 1-8-дахи ангинуудай һурагшад һургуулиин номой сангай жасаһаа номуудые абаха юм. Энэ хэрэгтэ уласай бюджетһээ нютагай засагай байгууламжануудта 207,4 сая түхэригэй мүнгэн тэдхэмжэ үзүүлэгдээ. Буряад уласай болбосоролой болон эрдэм ухаанай яаман уласай бюджетһээ һомологдоһон мүнгөөр 9-11-дэхи һургуулинуудта номуудые абаһан байна.
Һурагша бүхэнэй амгалан оршондо хүгжэхын тула һургуулинуудта 118 психологууд хүдэлхэ гэжэ баталагдаа. Уласай бүхы һургуулинуудта 500 һурагшада 1 психолог хүдэлхэ юм.
Анна Огороднигой гэрэл зураг
