995
Буряад Уласай Бэшүүр аймагай «Ара-Харлан» газарта наранай элшэһээ болон шэнгэн түлишөөр хүдэлдэг зайн галай станци табигдаба. Энэ газарта анхан зайн галгүй байһан юм. Тиигэжэ иимэ станцинуудые уласай холо оршодог хүдөө ажахынуудта табихаар түсэблэгдэнэ.
Зайн галай тоног хэрэгсэл «Хевел» компани хүдөө ажахы эрхилэгшэдэ дамжуулһан байна. Буряад Уласай Засагай газартай «Хевел» компани хэлсээ баталжа, уласай холо оршодог хүдөө ажахынуудта зайн галай станцинуудые барихаар хараална. Бэшүүр аймагай Билютай нютаг шадар «Ара-Харлан» газарта туршалгын түсэл бэелүүлэгдэнэ. Эндэ 10 кВт хүсэтэй наранай элшэһээ болон шэнгэн түлишөөр хүдэлдэг зайн галай станци баригдаа.
Хүдөө ажахы эрхилэгшэ Тулкимбек Эрматов арбаад жэлһээ дээшэ, адуу, хони, бодо мал, шубуудые үсхэбэрилдэг. Тэрэнэй ажахыда ганса хонидой тоо 2500-һаа дээшэ юм.
- Бидэ 10 жэл соо зайн галгүй ажаһуугаабди. Бензинээр хүдэлдэг генератор хэрэглэхэдээ, хамаг юумэеээ алмажа байгаабди. Үглөөгүүр эртэ болон үдэшэлэн хоёр час тухай туршада зайн гал аһаадаг байгаабди. Мүнөө зайн галай станци үдэрэй туршада ядамаггүй хүдэлнэ. Наратай үдэрнүүдтэ шэнгэн түлишэ оройдоо хэрэглээгүйбди, - гэжэ Тулкимбек Эрматов хөөрэнэ.
Һарын туршалгын шатада энэ зайн галай станци часай 100 кВт элшэ хүсэ үйлэдбэрилөө, тиихэдэ тэрэнэй 83 хубинь наранай элшэһээ хүдэлөө.
«Буряад Уласта энэ туршалгын түсэл. Хүдөө ажахы эрхилэгшэдэй зайн галай түлөө түлбэри бага болгохын тула иимэ станцинуудые олоор үйлэдбэрилхэ арга боломжонуудые хараалнабди», - гэжэ «Хевел» компаниин захирал Игорь Шахрай хэлэбэ.
Буряад Уласай 11 нютагта зайн галай һужаанууд үгы юм, тиихэдэ 45 хүдөө ажахыда түрүүлэн иимэ хэрэгсэл хэрэгтэй.
Тобшо мэдээн
2017 ондо Буряад Уласта «Хевел» компани Бэшүүр аймагта 10МВт хүсэтэй зайн галай станци бариһан юм. Байгша ондо Хори аймагта 15 МВт хүсэтэй наранай элшын зайн галай станциин барилга эхилэнхэй. 2022 он болотор улас дотор 80 МВт хүсэн хүрэтэр наранай элшын зайн галай станцинуудые барихаар түсэблэгдэнэ.
