​​Хабдарта үбшэнтэниие эмшэлхэ

Д-Н.Самбуев, А.Цыденов, Ц.Сампилова (сэтгүүлшэн), И.Шпак

Буряад Уласай Толгойлогшо Алексей Цыденов Улан- Үдэ хотодо баригдажа байһан Хабдарта үбшэнэй (он­кологиин) диспансер хүрэбэ. Буряад Улас дотор 2008 ондо энэ хүндэ үбшэнэй шэнэ байшангуудай барилга эхилээ бэлэй. Түрүүн шатын лучевой арга хэдэг байра 2011 ондо түгэсэһэн юм. Удаадахинь поликлиникэ, стационар гээд баригдаха түсэбтэй байһан аад, 2012 ондо мүнгэн зөөри һомологдохоёо болижо, барилга тогтошоһон юм.

Алексей Цыденов манай Буряад Уласай Толгойлогшо­ор томилогдожо ерэһээр лэ, энэ барилга саашань үргэлжэлүүлгын ажал ябуулаа. Оро­дой Холбоото Уласай Юрэн­хылэгшэ Владимир Путинтай уулзажа, энэ барилга дүүргэхэ талаар зүбшэл абаһан байгаа. Тиигэжэ 2018 ондо 783 сая түхэриг һомологдоо, тэрэ­нэй 43 сая мүнгэн Буряад Ула­сай һангай зөөриһөө гаргашалагдаба.

Мүнөө дээрээ барилга түлэг дундаа, эршэтэй ябуулаг­дажа байна. Алексей Цыденов бүхы дабхарнууд дээгүүр яба­жа, бултыень шалгаба. Тэрэнэй хэлэһээр, эндэ тон мүнөө үеын эгээл һайн хэрэгсэлнүүд, түхеэрэлгэнүүд худалдажа аб­тагдаха.

- Манай эгээл гол зорилго болбол хабдарта үбшөөр наһа бараһан ушарай тоо доошо­луулха, иимэ үбшэнтэй тэм­сэжэ байгшадай ажаһуудал һайжаруулха болоно. Мүнөөдэрэй тоогоор, Ородой Холбоо­то Уласта 100 мянган хүн сооһоо 192 хүн наһа барана, харин манай эндэ 178 хүн. Тиимэһээ үсөөн гээд һанаа амар бай­ха аргагүйбди. Энэ үбшэнтэй тэмсэл эгээл һайн шанартай, эгээл шэнэ сагай эрилтэдэ таа­рама хэрэгсэлнүүдые, эмүүдые хэрэглэжэ, арга хэдэг болохо ёһотойбди, - гэжэ Алексей Сам­буевич мэдээсэбэ.

Энэ һомологдоһон мүнгэн зөөреэр поликлиникэ дүүрэн баригдажа, ерэхэ 2019 ондо хүсэндөө оруулагдажа, ажалла­жа эхилхэ. Харин үбшэнтэдэй хэбтэдэг стационар болон үбшэ шалган элирүүлдэг цикло­трон хадаа 2021 ондо ашаглал­да абтагдахаар хараалагдана. Мүнгэн зөөри һомологдохоор хараалагданхай.

Гэхэ зуура, эндэ ганса ба­рилгаар дүүрэшэхэ бэшэ, мүн һайн шанартай, үндэр эрдэм мэдэсэтэй бэрхэ мэргэжэлтэ­дые бэлдэлгын асуудалда гол анхарал хандуулагдана.

- Онкологиин түрүү клиникэнүүдһээ дутуугүй, үндэр ша­нартайгаар ажаллахынь тула, бүхы эрилтэдэ таарама байдал зохёогдохо. Үбшэнтэн холо га­зар ошожо байхагүй, мүн элдэб туһатай эмүүдшье байра дээ­рээ бэлдэгдээд лэ, хэрэглэгдэ­жэ байха аргатай болохобди, - гэжэ Алексей Цыденов тэмдэглээ.

Валентин ПОМИШИНАЙ гэрэл зураг