​​Хүүгэдэй сэсэрлигүүд. Ээлжээнэй асуудал

Буряад Уласай болбосоролой ба эрдэм ухаанай сайдай орлогшо Валерий Поздняков

Хүүгэдэй сэсэрлигүүдтэ ээлжээн “Электронное образование” гэһэн мэдээсэлэй шэнэ аргаар бүридхэгдэдэг болобо. Гэхэ зуура хэлсэгдэһэн болзортоо, сентябриин 1-һээ, түрэлхид энэ шэнэ арга хэрэглэхэ аргагүй байшаба. Энэ асуудалаар Буряад Уласай болбосоролой ба эрдэм ухаанай сайдай орлогшо Валерий Поздняков тайлбарилба.

Манай Буряад Уласта хүүгэдэй сэсэрлигүүдтэ сүлөө һуури үгы, хүүгэд ээлжээндэ томо болотороо хүлеэдэг. 3-һаа 7 наһан хүрэтэр хүүгэдые дошкольно һуралсалаар хангаха арга боломжогүй газар можонуудай тоодо манай Буряад Улас оронхой.

- 2016 ондо хүүгэдэй сэсэрлигүүд болон һургуулиин урда тээхи һуралсалай эмхинүүдтэ 100 хубяар бүхы хүүгэднай хангагдадаг байгаа бшуу. Гэхэ зуура, тэрэ гэһээр байдал ондоо болоо. Хүүгэд олоор мүндэлэн түрөө, хүдөө аймагуудһаа хото руу олоороо бүлэнэр нүүжэ ерэнэ. Тиимэһээл сэсэрлигтэ орохо үхибүүдэй тоо эрид дээшэлээ, - гэжэ орлогшо сайд мэдээсэбэ.

Хүүгэдые сэсэрлигүүдтэ абаха ээлжээ бүридхэдэг арга мүнөө сагай эрилтэдэ таарахаар бэшэ болоходонь, Болбосоролой яаман шэнэ бүридхэл байгуулха ажал ябуулһан байна. Энэ ажал бүтээхэ харалган соносхогдожо, Самара хотын Иртех эмхи шүүгээ. Хуушан программа аяар 2013 ондо табигдаһан байгаа.

- Энэ шэнэ программын аргаар хэншье бүридхэгдэһэн хүүгэдэй ээлжээ һэлгүүлхэ аргагүй болоно. Энэнь тон һайн гээшэ. Гэхэ зуура, хоёр долоон хоногой туршада шэнэ түсэл руу хуушан түсэлһөө мэдээсэлнүүд табигдаха үедөө ехэ олон алдуунууд гараа, - гэжэ Валерий Поздняков мэдээсэбэ.

Шэнээр табигдаһан бүридхэл соо оло дахин бэшэгдэһэн нэрэнүүд элирүүлэгдээ. Хуушан түсэл соо нэгэ үхибүүн олон газарта хэдэн дахин бэшэгдээд, ээлжээнэй тоо олошоруулагдашаһан байгаа. Харин энэ түсэл нэгэ үхибүү оло дахин бэшүүлнэгүй. Мэргэжэлтэд шэнэ аргаар хүүгэдэй сэсэрлигүүдэй тоо бүридхэжэ, хэзээ, хэды үхибүүд дүүргэхэб, хэды шэнэ һууринууд гаража ерэхэб гэжэ шалган байха аргатай. Харин түрэлхид үхибүүнэймнай ээлжээн хэдыдэхи болобоб, хэзээ сэсэрлигтэ ябажа эхилхэб гэжэ мэдээсэл абажа байха болоно. Гэхэ зуура, сентябриин 1-һээ электронно сүлжээ холбооной аргаар энэ мэдээсэлэй портал түрэлхидтэ харуулагданагүй. Энэ асуудалаар түрэлхид ехэ һанаата боложо, эдэ үдэрнүүдтэ Болбосоролой хороон, яаман руу хандана. Мэргэжэлтэд хандаһан түрэлхидтэ бүрин тодорхой мэдээсэл үгэнэ.

- Энэ портал бидэндэ харагдана, бидэ тэрэнээр ажалланабди. Түрэлхид өөһэдөө ерэжэ, ээлжээгээ мэдэхэ аргатай бшуу. Мүнөө сагта түрэлхид хүүгэдээ сэсэрлиг руу оруулха мэдүүлгэ нютаг аймагай байгуулалтанууд руу, МФЦ албан руу болон Госуслуги гэһэн холбоогоор бариха аргатай. Түрэлхидтэ мүнөө сагта юундэ харагданагүйб гэжэ элирүүлэгдэжэ байна, - гэжэ орлогшо сайд тэмдэглээ.

Хүүгэдэй сэсэрлигүүд май һарада бүридхэгдэдэг заншалтай. Гэхэ зуура, зунай сагта элдэб хубилалтанууд боложо, сентябриин хуушаар дахин бүридхэгдэжэ, үлүү һууринууд гаража магад. Тиигэжэ үхибүүд ээлжээгээ найдан хүлеэдэг юм.

Хүүгэдэй үмсын сэсэрлигүүд жэл хахадай хугасаада олошороо бэлэй. Оройдоол 11 эмхи байһан һаа, 25 болоһон юм. Мүнөө энэл зандаа үлэнхэй. Үмсын шэнэ сэсэрлигүүд, һуралсалай эмхинүүд байгуулагданагүй.

- Харин Буряад Улас Ород гүрэнэй федеральна туһаламжагүйгөөр энэ асуудал шиидхэжэ диилэхэгүй бшуу. Бидэнэй тоо баримтаар, хүүгэдэй сэсэрлигэй бэрхэшээлтэ асуудал шиидхэхэ гэбэл, манай улас дотор 27 сэсэрлиг бариха хэрэгтэй, тэрэнэй 20-нь Улаан-Үдэ хотодо, - гэжэ сайдай орлогшо тайлбарилба.

Август һарада Буряад Уласай Толгойлогшо Алексей Цыденов хүүгэдэй сэсэрлигүүд руу ээлжээндэ 25 мянган үхибүүд зогсоно, тэдэнэй 5,8 мянганиинь – 3-һаа 7 наһа хүрэтэр, 4,8 мянганиинь Улаан-Үдэдэ бүридхэгдэнхэй гэжэ мэдээсээ бэлэй.

Хүүгэдэй сэсэрлигэй ээлжээнэй орёо асуудал шиидхэхын түлөө Алексей Цыденов юрэнхы сайд Дмитрий Медведевтэй уулзаа бэлэй. Тэндэ Буряад Уласта хүүгэдэй сэсэрлигүүдые шэнээр бариха тухай даабари үгэһэн байха юм. Гэхэ зуура, Улаан-Үдэ хотодо хүүгэдэй сэсэрлигүүдэй ээлжээн 1 мянгаар жэл бүри олошорно. Энэнь хадаа олоор нялха үхибүүдэй мүндэлэн бии болоһонһоо дулдыдабашье, һүүлэй үедэ Улаан-Үдэдэ хүүгэдэй шэнэ сэсэрлигүүд удаан саг соо баригдаагүй бшуу.