​​Түрүүшын хонхо жэнгирбэ

Улаан-Үдын 29-дэхи буряад гимназида сентябриин 1-эй һайндэрые угтуулһан жагсаал заншалта ёһоороо һургуулиин байшанай урдахана үнгэрбэ. Баглаа сэсэгүүдэй саанаһаа багашуулай нюурнууд харагданагүй гэхэдэ болоно. Багшадаа хүтэлүүлһэн 1-дэхи ангиин шабинар олоной альга ташалган доро урда гаража зогсобо. Байгша ондо 92 үхибүүн 3 анги бүридүүлбэ бшуу.

Тиихэдэ бусад ангиинхид түрисэлдэн һагад байна. Бүхэли зундаа уулзаагүй эдиршүүл жагсаалда болоһон үйлэ хэрэгһээ холуур хэбэртэй. Бэе бэеһээ һонин һорьмойгоо асууна. Зарим тоомгүй хүбүүд басагадай үһэ татаад абана, шэмхээдшье туршана. Тогтууригүй багашуул жагсаалай дүүрэхые тэсэн ядан хүлеэнэ.

Гимназиин шэнэ багшанартай танилсалга болобо. Психологиин, тоо бодолгын, биологиин, ород хэлэ болон литературын багшанар ерээ.

Гимназиин захирал Баяр Шираповай мэдүүлһэээр, байгша ондо һургуулияа түгэсхэһэн һурагшад мэргэжэл шудалхаяа оюутад болоо. Ородой Холбоото Уласай түб хотонуудай ехэ һургуулинууд руу орогшодшье бии. Гимназиин багшанарай һурагшадайнгаа саашанхи замаар һанаата болодог байһандань ехэ урмашахаар байна.

Удангүй түрүүшын хонхо жэнгиржэ, үхибүүд бултадаа хэшээлнүүдтээ тарана һэн.

Авторай гэрэл зурагууд