933
Мүнөөдэр, сентябриин 5-да, Буряад Уласай Толгойлогшо Алексей Цыденов Улаан-Үдэдэ перинатальна түбэй нээлгын баяр ёһололдо хабаадаба.
- Мүнөөдэр Буряад Уласта ехэ шухала хэрэг бүтэбэ. Мүнөө үеын оньһон хэрэгсэлнүүдээр хангагдаһан перинатальна түбэй нээгдэбэ. Нарай нялха үхибүүдэй наһа бараха ушар бага болгохо гээшэ манай беэлүүлхэ гол зорилго болоно. Мүнөө эмшэд хүндөөр түрэгдэһэн нарай үхибүүдые эмнэхэ, нарайлха үедэ элдэб бэрхэшээлнүүдтэй ушарһан эхэнэрнүүдтэ эмнэлгын туһа хүргэхэ аргатай болобо. Перинатальна түбтэ нарайлха, нарайлһан эхэнэрнүүдтэ аюулгүй оршондо эмнэлгын туһа хүргэхэ аргатай, - гэжэ Алексей Цыденов хэлэбэ.
Долоон дабхартай, 120 һууритай перинатальна түбэй барилга «2011-2017 онуудта Буряад Уласай элүүрые хамгаалгын һалбариин һэльбэн шэнэдхэлгэ» гэһэн федеральна программын хэмжээндэ 2014 ондо эхилһэн юм.
- Перинатальна түбтэ нарайлха эхэнэрнүүдэй үхибүү түрэлгэдэ эмнэлгын туһа хүргэхэ аргатай. Ростех бүлгэм гүрэн дотор иимэ 15 түб бариһан юм. Эдэ түбүүд Ород гүрэндэ үйлэдбэрилэгдэһэн мүнөө үеын неонатальна эмнэлгын хэрэгсэлнүүдээр хангагданхай гэжэ онсолон тэмдэглэнэб. Тэрэ тоодо, Ростех бүлгэмэй филиал болохо «Швабе» холдингдо хэрэгсэлнүүд үйлэдбэрилэгдөө. Манай корпорациин бариһан, хэрэгсэлнүүдээр хангагдаһан перинатальна түбүүдтэ 30 мянганһаа дээшэ үхибүүд түрэһэн байна, - гэжэ Ростех бүлгэмэй юрэнхы захиралай орлогшо Николай Волобуев хэлэбэ.
Перинатальна түбэй барилгада 3 миллиардһаа дээшэ түхэриг һомологдоһон байна. Тэрэнэй 2,4 миллиард түхэригынь Эмнэлгын заатагүй даадхалай федеральна жасын тэдхэмжэ болоно. Тиихэдэ уласай бюджетһээ 580 сая түхэриг һомологдоо.
Табан корпусто 120 һууритай перинатальна түб, акушерскэ, неонатологическа стационарнууд, зүбшэлэгшын-шэнжэлэлгын таһаг байрланхай. Перинатальна түб мүнөө үеын эмнэлгын оньһон хэрэгсэлнүүдээр хангаданхай. Тэрэ тоодо, агаар сэбэрлэхэ тусхай хэрэгсэл тодхогдонхой.
Нарайлалгын таһагта ганса гансаар нарайлха 11 таһагууд бии. Бага шэгнүүртэй, хүндөөр нарайлагдаһан үхибүүдтэ эмнэлгын туһа хүргэхэ реанимациин болон терапиин таһагта эгээл олон эмнэлгын хэрэгсэлнүүдээр хангагданхай. Дутуу гараһан үхибүүдтэ туһа хүргэхэ таһагта 30 һууритай. Эжынэр эндэ үхибүүнтэеэ үнжэхэ гү, али үдэрынь ерээд байха аргатай. Нарай үхибүүдтэ эмнэлгын туһа хүргэлгэдэ түрэлхид эдэбхитэй хабаадаха юм.
Операци хэдэг таһаг бүхы 5-даха дабхар эзэлжэ, операци хэхэ гурбан танхимтай.
Эмнэлгын туһа хүргэхэ мэргэжэлтэдые һургаха, бэлдэхэ талаар Буряад Уласай бюджетһээ 20 саяһаа дээшэ түхэриг һомологдоо. 154 эмшэд болон эмнэлгын дунда мэргэжэлтэй 79 хүдэлмэрилэгшэд һуралсал гараһан байна.
Анна Огороднигой гэрэл зурагууд
