832
Буряад Уласай Байгал шадарай аймагай долоон һомоной 31 гудамжада «Аюулгүй, һайн шанартай харгынууд» гэһэн юрэнхылэгшын түсэлөөр харгынууд заһабарилагдаба.
Улаан-Үдэ хотодо болон дүтэ оршодог Ивалга, Тарбагатай, Загарай болон Байгал шадарай аймагуудта «Аюулгүй, һайн шанартай харгынууд» гэһэн юрэнхылэгшын түсэл бэелүүлэгдэнэ гэжэ һануулнабди. 2017 ондо Байгал шадарай аймагай 13 гудамжада 8,3 модоной зайда харгы заһабарилагдаһан һаа, байгша эндэ энэ түсэлөөр 23,463 модоной зайда харгы шэнэлэгдэбэ.
Харгы ашаглалгада тушааха ёһололдо Буряад Уласай Толгойлогшо Алексей Цыденовэй хэлэһээр, Турунтево һууринда ехэнхи харгынууд асфальтаар хушагдаа.
- «Аюулгүй, һайн шанартай харгынууд» гэһэн түсэлэй хэмжээндэ Байгал шадарай аймагта байгша ондо харгы заһабарилгада 170 сая түхэриг һомологдоо. Һайн шанартай харгынууд хэгдэжэ, харгын аюулгүй байдал сахижа ябаха шухала, - гэжэ уласай хүтэлбэрилэгшэ хэлэбэ.
Харгы нээлгын баяр ёһололдо аймагай эдир ажаһуугшад велисипедүүдые унажа, ябаган харгыгаар гүйлгэлдэбэд.
- «Аюулгүй, һайн шанартай харгынууд» түсэл 2015 он болотоор бэелүүлэгдэхэ. Түсэл бэелүүлгэдэ жэлэй 1 миллиард 250 сая түхэриг һомологдоно. Тиихэдэ гансашье энэ түсэлөөр бэшэ, үшөө уласай программануудай хэмжээндэ харгынууд заһабарилагдана, - гэжэ Алексей Цыденов тэмдэглэбэ.
Турунтаево һууринай Комсомольская, Коммунистическая, Некрасова, Байкальская, Советская, Гагарина, Трудовая, 50 лет Октября, Пионерский гудамжануудта харгынууд заһабарилагдаа. Ильинка һууринай Комарова, Школьная, Садовая, Терешковой, Курортная гудамжануудта харгынууд шэнэлэгдээ.Татаурово станцида Сельскохозяйственная, Школьная, Молодежная гудамжануудта, Ильинкэдэ - Орсовский, Гусева, Гагарина гудамжануудта, Итанца нютагта - Трактовая, Советской Армии, Гаражный, Советская, Октябрьская гудамжануудта, Троицкое нютагта - 60 - лет Октября гудамжада, Мостовка нютагта - Ленина, Старое Татаурово нютагта – Юбилейная, Таловка станцида Лазогой, Серова гудамжануудта харгы шэнэлэгдээ. Октябриин 31-дэ бүхы харгынууд ашаглалгада тушаагдаха юм.
2018 оной дүнгүүдээр, харгын эрилтэнүүдтэ таараһан харгынууд 9 хубяар дээшэлүүлэгдэжэ, бүхыдөө 39,7 хуби болохо юм. 2025 он болотор харгын эрилтэдэ таараһан харгынууд 97 хуби хүрэтэр дээшэлүүлэгдэхэ.
Байгал шадарай аймагай дэбисхэртэ олоной хэрэглэдэг 599,7 модоной харгы юм. «Аюулгүй, һайн шанартай харгынууд» түсэлэй хэмжээндэ 2025 он болотор 652,7 сая түхэриг һомологдожо, 78,8 модоной зайда харгынууд заһабрилагдаха юм. 2019 году Таловка, Югово, Троицкое, Ильинка, Карымск һууринуудта хүрэхэ 7,421 модоной зайда харгынууд заһабарилагдаха.
Анна Огороднигой гэрэл зураг
