947
Буряад Уласта 2017 ондо аяншалгын 43 эмхи хүдэлһэн байна. Тиин тэдэнэй 88,4 хубинь Улаан-Үдэ хотодо ажалаа ябуулаа. Аяншалгын эмхинүүд 30,3 мянган аяншалагшадые хангажа, бүхыдөө 227,5 сая түхэригэй хэмжээндэ хангамжануудые үзүүлээ юм.
Нёдондоной дүнгүүдээр уластамнай ерүүл зон тон олоор аяншалаа. Тиигэжэ хари гүрэнүүдэй 14,4 мянган ажаһуугшад Буряад ороноор айлшалһан байна. Илангаяа Хитадһаа ерэһэн зоной тоо 2016 онойхитой сасуулхада, аяар 92,8 хубяар дээшэлээ, Тайваньһаа - 41,4 хубяар, Монголһоо - 16,5 хубяар, харин Солонгосһоо ерэһэн аяншалагшадай тоо 9,8 дахин ургаа, Япон гүрэнһөө – 4 дахин. Гадна Австрали, Австри, Германи, Испани, Итали, Великобритани, Ирланди, США, Франци, Швейцари болон бусадшье гүрэнүүдэй ажаһуугшад аяншалһан байна. Гол шухалань гэхэдэ, хариин айлшадай аяар 97,8 хубинь имагтал Буряад орондомнай зорижо ерээ юм. Бэшэниинь Краснодарай хизаар, Эрхүү ба Новосибирск можонуудаар ябаа.
Дотоодын гэхэ гү, али гүрэн соогуураа аяншалга тухай хэлэбэл, 2017 ондо 9,9 мянган хүн тус шэглэл шэлэһэн байна. Зүгөөр тэдэнэйнь 89,3 хубинь эндээ, Буряад оронойнгоо дэбисхэр дээрэ амараа. Бусадынь Краснодарай хизаар, Крым Улас, Санкт-Петербург ба Москва хотонуудаар аяншалаа.
Хари гүрэнүүдээр ябаһан эрхэтэдэймнай тоо Буряад Уласай аяншалгын эмхинүүдэй хангаһан бүхы аяншалагшадай 19,7 хуби бүридхөө. Манай ажаһуугшадта тон ехээр һайшаагдаһан гүрэнүүд гэбэл, Тайланд, Хитад ба Вьетнам болоно.
Гүрэнэй тоо бүридхэлэй федеральна албанай Буряад Уластахи зургаанай мэдээнүүдээр Любовь ЦЫБЕНОВА бэлдэбэ
