​​Буряад Уласай Мухар-Шэбэр аймагта мэргэн буушанда дурасхаалай самбар үлгэгдэбэ

Агуу дайнда онсо шалгарһан мэргэн буушан Сэрэндаша Доржиевай нэрэмжэтэ гудамжада дурасхаалай самбар Мухар-Шэбэр тосхондо мүнөөдэр үлгэгдэбэ.

Энэ хэмжээ ябуулгада мэргэн буушанай түрэлхидынь, һургуулиин үхибүүд олоор хабаадаһан байна. Аймагай засаг дарга Владимир Молчанов, аймагай номой сангай захирал Анна Фёдорова гэгшэд энэ хэмжээ ябуулга эмхидхээ гээд, Сэрэндаша Доржиевай аша хүбүүн, Россиин Уран зохёолшодой холбооной гэшүүн Сергей Доржиев дуулгаба. Тэрэ үбгэн аба тухайгаа иигэжэ бэшэһэн байдаг: “Гал дүлөөр соробхилһон 1941 оной Эсэгэ ороноо хамгаалгын дайнда хам оролсон тэмсэгшэдэй нэгэн болохо мэргэн буудагша Сэрэндаша Доржиев Түгнэ голой эрьедэ оршодог Барай-Адаг гэһэн нютагай һэн. Багаһаа бууда дуратай, түрэхын тэнсэлгүй мэргэн агша һэн. Хүрин хуйта таба һүрэдэгые Сэрэндаша Доржиев гартаа барижа, оройдоол 14 һарын туршада шуһа мяхаараа оролсон, үсэдөөр дайлалдаа. 1942 оной май һарада «Мессершмит» түхэлэй фашистнуудай истребитель буудажа унагаахадань, Советскэ Союзай Геройн нэрэ зэргэдэ Баруун-Хойто фронтын жанжанууд зууршалһан байгаа. Харин тиихэдэнь түмэршэ, модошо, алташа, мүнгэшэ дархан Доржо эсэгынь ангиин дайсан гүүлэжэ сүлэгдэһэнэй шалтагаанаар Ленинэй орден Алтан Гадаһагүйгөөр барюулаа һэн. Бүхы фронтоор, орон дотороо суурхажа байһан мэргэн буудагша Сэрэндаша Доржиевай хюдаһан фашистнуудай тоо 297 хүрэһэн байгаа. 1942 оной декабриин 31-дэ тэрэ хүндөөр шархатаад, мүлхихэшье аргагүй һэн тула мүргэлдөөд байһан хоёр фронтын дундахи зайдуу газарта хоёр хоногой туршада дайшалхы нүхэдөө хүлеэжэ хэбтээ. 1943 оной январиин 2-ой үдэр совет сэрэгшэд буудалдаан соогуур арга мүрыень оложо, шэрэжэ гаргаа, харин январиин 3-да даншье ехээр хүндэрһэн шархаһаа боложо, тэрэ ами наһанhаа хахасаа бэлэй.

Түрэһэн гараһан Түгнын һайхан дайданууд

Түмэн жэлдэ шинии нэрээр мандаг лэ! – гэжэ элитэ уран зохёолшо Хоца Намсараев «Гэрэлтэ Сэрэндашын дурасхаалда» гэһэн шүлэг соогоо үреэһэн байдаг. Сэрэндаша Доржиев тоонто нютагаа амиды мэндэ бусажа ерээшьегүй һаа, алдарта нэрээрээ, үндэр баатар солоороо арад зонойнгоо һанаа сэдьхэлдэ алтан үзэгүүдээр бэшэгдэн оронхой, хүрэл дүрсэ-хүрэгөөрөө урган ябаа халааниие урмашуулан хүмүүжүүлжэ байдаг”.

Интернедһээ абтаһан гэрэл зураг