890
Мүнөөдэр, октябриин 15-да, Улаан-Үдэдэ үглөөнэй 11 сагһаа «Буряад Уласай ажаһуугшадай эрхэ хамгаалан, эрхэтэдэй эдэбхи үүсхэл болон олониитын хиналта» гэһэн эрхэтэдэй хуралдаан ажалаа эхилхэ. Олониитын танхимай түрүүлэгшэ Баир Бальжировай хэлэһээр, тус хэмжээ ябуулгын ашаар, уласай хүгжэлтын асуудалнуудые шиидхэлгэдэ эрхэтэдэй олониитын үүргэ шэнжэлхэ арга боломжо засаг зургаанай түлөөлэгшэд болон олониитын ажаябуулагшадта олгогдоно.
«Гүрэнэй хүтэлбэриин ажал олондо ойлгосотой, харагдаха талаар ажаһуугшад олониитын хиналта ябуулха эрхэтэй. Засаг зургаанай түлөөлэгшэд олониитэтэй зүбшэжэ, ажалаа ябуулбалнь һайшаалтай», - гэжэ Баир Бальжиров тэмдэглэбэ.
Ородой Холбоото Уласай Олониитын танхимда Буряад Уласай түлөөлэгшэ Галина Горбатых гэгшын хэлэһэээр, эрхэтэдэй хуралдаан хадаа олониитын асуудалнуудые засаг зургаанда дуулгаха арга болоно.
Хоёр үдэрэй туршада хуралдаанда хабаадагшад уласай хүгжэлтын асуудалнуудаар зүбшэжэ, урид абтаһан зорилгонууд хэр зэргэ бэелүүлэгдээб гэжэ дүн согсолхо юм. Тэдэнэр хадаа болбосоролой һалбари хүгжөөхэ, Байгалай хизаарай экологи сахиха, гэр байрын ажахы шэнэдхэлгын аша үрэтэй хүтэлбэри эмхидхэхэ, хүдөө нютагуудые хүгжөөхэ болон бусад асуудалнуудаар хэлсэхэ.
Үнгэрһэн жэлдэ эрхэтэдэй хуралдаанда 1,5 тухай хүн хабаадаа. Буряад Уласай Олониитын танхимай түрүүлэгшын тэмдэглэһээр, асуудалнуудые шиидхэлгэдэ ажаһуугшад эдэбхитэйгээр хабаадаһан байна гэжэ һануулнабди.
Эрхэтэдэй хуралдаанай пленарна суглаанда Буряад Уласай Толгойлогшо Алексей Цыденов, Буряад Уласай Арадай Хуралай һунгамалнууд, аймагуудай хүтэлбэрилэгшэд, Ородой Холбоото Уласай можо нютагуудай Олониитын танхимуудай түлөөлэгшэд, олониитын эмхинүүдэй хүтэлбэрилэгшэд, эдэбхитэд болон бусад хабаадаха юм.
Буряад Уласай Засагай газарай хэблэлэй албанай гэрэл зураг
