787
Буряад Уласай ниислэл хотодо октябриин 24-25-най үдэрнүүдтэ уласай мэдээсэлэй-эдэй засагай техникумдэ «Абилимпикс» гэһэн уласай түрүүшын чемпионат үнгэргэгдэнэ. Хоёр үдэрэй туршада эрэмдэг бэетэй хүнүүдэй дундаһаа эрхим мэргэжэлтэд элирүүлэгдэхэ.
Буряад Уласай Засагай газарай Түрүүлэгшын ниигэмэй хүгжэлтын талаар орлогшо Вячеслав Цыбикжаповай хэлэһэнэй ёһоор, мүрысөөнэй хэмжээндэ эрэмдэг бэетэй хүнүүдтэ ниигэмэй туһа үзүүлхэ, тэдэниие ажалаар хангаха, эрэмдэг бэетэй зоной олониитын эмхинүүдэй ниигэмэй түсэлнүүдые бэелүүлхэ талаар асуудалнууд шиидхэгдэхэ.
- Буряад Уласта анха түрүүшынхиеэ үнгэргэгдэжэ байһан чемпионат саашадаа жэл бүри эмхидхэгдэхэ гэжэ найданаб. Уласай шатада илагшад Ородой Холбоото Уласай мүрысөөндэ хабаадаха. Эрэмдэг бэетэй зондо ажалай һууринуудые байгуулха талаар мүнгэн һомологдонхой, саашадаа энэ хэмжээ ябуулга олон эмхинүүдэй хабаадалгатай үнгэргэхэбди, - гэжэ Вячеслав Цыбикжапов тэмдэглэбэ.
«Абилимпикс» гэһэн уласай чемпионадта дунда мэргэжэлэй болбосоролой эмхинүүдэй оюутад хабаадана. Тэдэнэр сетевой болон системнэ администрировани; электронно тоног хэрэгсэлнүүдые задалха, суглуулха; эдеэ хоол шанагшадай; шэрдэлгэ-будалгын ажалай; ниитын ажаябуулга, веб-дизайн, LEGO-конструировани, робототехникэ, дэгээ зүүгээр нэхэхэ, дуу дуулаха гэһэн 10 һалбарида хаба шадалаа туршажа, эрхимүүд элриүүлэгдэхэ.
Буряад Уласта «Абилимписк» гэһэн чемпионат үнгэргэлгэдэ Засагай газар 2,7 сая түхэриг һомолһон байна. Тиихэдэ мүрысөөндэ илагшадые урмашуулгада 810 мянган түхэриг нэмэгдээ.
Тус мүрысөөнэй хэмжээндэ албанай, үзэсхэлэнэй, мэргэжэл шэлэлгын болон соёлой программанууд эмхидхэгдэхэ. Эрэмдэг бэетэй үхибүүдэй мэргэжэл шэлэлгын асуудалнуудаар дүхэриг шэрээ эмхидхэгдэхэ. Дүхэриг шэрээдэ һурагшад болон түрэлхид хабаадажа, тиихэдэ мэргэжэлэй талаар хүгжэлтын арга боломжонууд болон ажалтай болохо талаар асуудалнуудаар хэлсэхэ.
«Абилимпикс» хадаа уласхоорондын хүдэлөөн болоно. Тэрэнэй хэмжээндэ эрэмдэг бэетэй зоной мэргэжэл шэлэхэ, саашадаа ажалтай болохо талаар мүрысөөнүүд үнгэргэгдэдэг. Ородой Холбоото Уласай можо нютагуудта жэлэй туршадай мүрысөөнүүд үнгэргэгдэнэ. Можо нютагуудай хэмжээндэ илагшад Москва хотодо ноябриин 20-һоо 23 болотор эмхидхэгдэхэ «Абилимпикс» гэһэн үндэһэтэнэй IV чемпионадта хабаадаха.
«Абилимпикс» түбэй хэблэлэй албанай гэрэл зураг
