781
Мухар-Шэбэр аймагай Сагаан-Нуур һууринда «Болбосон түхэлтэй хотын оршон байгуулга» гэһэн түсэлөөр хүүгэдэй талмай ашаглалгада тушаагдаба. Тэрэнэй заһабарилгада хуби ниилүүлһэн нээмэл «Түгнын уурхай» бүлгэм горитой хубитаяа оруулалсаа.
Байгша оной март һарада үнгэргэгдэһэн олониитын һунгалтада Сагаан-Нуур һууринай ажаһууугшад хүүгэдэй наадаха талмай хэрэгтэй гэжэ нэгэн дуугаар шиидэһэн байна. Тиигэжэ «Болбосон түхэлтэй хотын оршон байгуулга» гэһэн түсэлөөр заһабарилгын ажалда федеральна бюджетһээ 2,4 сая түхэриг һомологдоо. «Түгнын уурхай» бүлгэм 2,5 сая түхэриг һомолһон байна.
- Удаадахи жэлнүүдтэ үшөө олониитын 22 газар заһабарилха түсэбтэйбди. Ажаһуугшад энэ хүүгэдэй наадаха талмайн түлөө һунгаһан хадаа гамтайгаар хандаха, - гэжэ «Сагаан-Нуурай» һомоной дарга Максим Исмаилов хэлэбэ.
2019 онһоо хойшо хотын оршон болбосон түхэлтэй болгохо талаар «Гэр байра болон хотын оршон» гэһэн үндэһэтэнэй түсэлөөр үшөө 6 жэлдэ бэелүүлэгдэхэ.
- Удаадахи жэлдэ энэ түсэлөөр мүнгэ һомололго 100 сая түхэригөөр дээшэлүүлэгдэжэ, 319 сая түхэриг болохо юм, - гэжэ Буряад Уласай барилгын болон гэр байрын ажахы шэнэдхэлгын сайдай орлогшо Евгений Коркин хэлэбэ.
Буряад Уласта «Болбосон түхэлтэй хотын оршон байгуулга» гэһэн түсэл барилгын болон гэр байрын ажахы шэнэдхэлгын яаман хүтэлбэрилнэ. Байгша ондо энэ түсэлдэ уласай 104 һуурин хабаадаа, 2017 онтой жэшэхэдэ, энэнь 4 дахин ехэ гээд тэмдэглэлтэй. «Болбосон түхэлтэй хотын оршон байгуулга» гэһэн түсэл 2017 ондо бэелүүлэгдэжэ эхилһэн сагһаа хойшо 4 парк, олониитын 27 газар, олон байратай гэрнүүдэй шадархи 248 талмай заһабарилагдаа. Байгша ондо олон байратай гэрнүүдэй шадархи 125 талмай болон олониитын 99 газар заһабарилагдажа, ашаглалгада тушаагдаха.
