870
Байгша оной октябриин 26-да үглөөнэй 11 сагһаа 14 саг болотор уласай бизнес-инкубаторта ажалай һууринуудай яармаг эмхидхэгдэхэ. Энэ хэмжээ ябуулгада уласай болон ниислэл хотын 70-һаа дээшэ үйлэдбэри, эмхинүүд хабаадаха.
Ажаһуугшадые ажалаар хангалгын түбэй эмхидхэһэн хэмжэ ябуулгада Улаан-Үдын авиационно завод, Бурятхлебпром, Улаан-Үдын стальмост, «Николаевский» агрохолдинг, дотоодын хэрэгүүдэй яаман, Байгалай бүд үйлэдбэриин компани болон бусад эмхинүүд 1,1 мянганһаа дээшэ ажалай һууринуудые дурадхаха. Тэрэ тоодо, наһанайнгаа амаралтада гараха дүтэлһэн хүнүүдтэ ажал дурадхагдаха гэжэ ажалаар хангалгын уласай түбтэ мэдээсэбэ.
Тиихэдэ ажалтай болохо гэжэ ябаһан хүнүүд «Ород гүрэн дотор ажал хүдэлмэри» гэһэн бүхэроссиин ажалай һууринуудай банктай танилсаха аргатай. Тэдэнэр «SKILLSNET» гэһэн ниитэ сүүлжээндэ бүридхэлдэ орожо, өөр тухайгаа мэдээсэл орхиходонь, Ородой Холбоото Улас дотор ажалаар хангагшад тэрэ мэдүүлгэтэйнь танилсаха.
Һургуули дүүргэгшэд болон шабинарта зорюулагдаһан тусхай хэмжээ ябуулганууд яармагай үедэ эмхидхэгдэхэ. Һурагшад анха түрүүшынхиеэ квест нааданда хабаадажа, ажалай мэргэжэлнүүдтэй танилсаха.
Буряад уласай болбосоролой 14 эмхи яармагта хабаадажа, мэргэжэлтэдые бэлдэхэ тон хэрэгтэй шэглэлүүдтэй танилсуулха. «Ород гүрэнэй оюутадай отрядууд» гэһэн залуушуулай уласай эмхи тусхай хэмжээ ябуулга эмхидхэхэ. Тиихэдэ хабаадагшад өөр тухай мэдүүлгэ (резюме) бэшэхэ талаар мастер-классудта хабаадаха.
