1130
«Буряад үнэн» Хэблэлэй байшанай, Буряадай гүрэнэй телевидени болон радиогой, «Ариг ус», «МИР-Бурятия», Захааминай «Ажалай туг» сониной түлөөлэгшэд эблэл байгуулха, тэрэнэй бэелүүлхэ зорилгонууд тухай зүбшэн хэлсэбэ. Суглаанай үедэ буряад хэлэн дээрэ дамжуулдаг сэтгүүлшэдэй хомор болоһониинь тэмдэглээ. Тиимэһээ дүй дүршэл ехэтэй, ульгам буряад хэлэтэй мэдээжэ сэтгүүлшэдые урижа, мастер-классуудые үнгэргэхэ, оюутад, һурагшадые эдэбхитэй хабадуулха тухай Буряадай гүрэнэй телевидениин редактор Дарима Жамсоева хэлэбэ.
- Буряадаар дамжуулдаг сэтгүүлшэдэй хабаадаха уласай мүрысөөн, фестивальнуудые эмхидхэхэ шухала. Тиихэдэ сэтгүүлшэдые урмашуулха хэрэгтэй, - гэжэ Дарима Жамсоева тэмдэглэбэ.
Буряад уласай ганса Захаамин болон Хэжэнгэ аймагуудта буряад хэлэн дээрэ сонин хэблэгдэнэ. Захааминай «Ажалай туг» сонин һарын хоёр дахин, Хэжэнгын «Хэжэнгэ» сонин долоон хоногой нэгэ дахин гарана. «Ажалай туг» сониной редактор Соёлма Бальжурова хүдөө нютагуудта ушардаг орёо асуудалнууд тухай тэмдэглэбэ.
- Хүдөө нютагуудта буряадаар бэшэхэ залуушуул үгы. Ородоор бэшэхэ хүниие бэдэрхэ арга ологдодог һаа, буряад хэлэн дээрэ бэшэхэ хүн хомор. Тиимэһээ үхибүүдые һургуулиһаань хойшо бэлдэхэ гэжэ хөөрэлдэнэбди. Яагаад залуушуулые һонирхуулхаб, урмашуулхаб? – гэһэн нэгэн доро шиидхэгдэхэгүй асуудалнуудые Захааминай сониной түлөөлэгшэ табиба.
Буряадаар дамжуулдаг сэтгүүлшэдэй эблэл буряад хэлэн дээрэ бэшэдэг, дамжуулдаг сэтгүүлшэдэй эрхэ хамгаалха; мэргэжэлээ дээшэлүүлхэ хэмжээ ябуулганууд болон мастер-классуудые эмхидхэхэ; Буряад Уласай Засагай газарта залуу халаан бэлдэхэ тухай дурадхал оруулха, буряад журналистикын һургуули эмхидхэхэ; буряадаар дамжуулдаг сэтгүүлшэд болон олонддо мэдээсэл тараадаг хэрэгсэлнүүдэй дунда уласай, можо хоорондын мүрысөөнүүдыее үнгэргэхэ; буряадаар дамжуулдаг сэтгүүлшэдэй фестивальнуудые эмхидхэхэ; дүй дүршэлөөрөө андалдаха, мэргэжэлээ дээшэлүүлхэ можо хоорондын болон уласхоорондын хуралдаануудта хабаадаха; нютагай засагай байгууламжануудай хүтэлбэрилэгшэд болон редакцинуудтай хамта аймагуудай сонинуудта буряад хэлэн дээрэ тусхай хуудаһа хэблэхэ гээһн хүнгэн бэшэ зорилгонуудые бэелүүлхэ гэжэ түсэблэбэ.
«Буряад үнэн» Хэблэлэй байшанай захиралай уялга дүүргэгшэ Баир Шираповай хэлэһээр, Монголой мэдээсэлэй «Монцаме» агентствэтэй суг ажалаа ябуулха тухай хэлсээн баталагдаа. Саашадаа Шэнэхээнэй буряадуудтай суг хамта ажалаа ябуулха түсэбтэйбди гэжэ тэмдэглээ.
Суглаанай дүнгүүдээр, буряадаар дамжуулдаг сэтгүүлшэдэй эблэлэй зүблэлдэ «Буряад үнэн» Хэблэлэй байшанай захиралай уялга дүүргэгшэ Баир Ширапов, редактор Бадмажаб Гындынцыренов, Буряадай гүрэнэй телевидени болон радиогой редакторнууд Дарима Жамсоева, Ольга Намдакова, «Ариг ус» телевидениин зүгһөө Даша-Доржо Болотов, «МИР- Бурятия» телевидениин түлөөлэгшэ Баяр Жигмитов, Захааминай «Ажалай туг» сониной Соёлма Бальжурова гэгшэд ороһон байна. Тиихэдэ хүршэ Үбэр-Байгалай хизаарай, Эрхүү можын буряад сонинуудай редакторнууд, «Буряад-ФМ» радиогой захирал, «Хэжэнгэ» сониной редактор зүблэлдэ орохо юм.
Буряад хэлээр дамжуулдаг сэтгүүлшэд саашадаа холо, ойро гэнгүй, нюур нюураараа уулзажа харилсаха, дүй дүршэлөөрөө хубаалдажа, ажалаа ябуулхань дамжаггүй. Дутуу дундануудаа зүбшэн хэлсэжэ, аха үеын сэтгүүлшэдһээ дүршэлыень халан абажа, залуушуулые һургажа, бэе бэеэ дүмэлсэжэ, түрэл хэлэнэйнгээ баялиг дамжуулжа ябаха сэнтэй даа.
Аркадий Батомункуевай гэрэл зурагууд
