​Буряад Уласта хүдөө ажахынууд үбэлжэлгэдөө бэлдэнэ

Хүйтэн үбэлнай удангүй ерэхэнь. Бүхы Буряадта хүдөө ажахын хүдэлмэрилэгшэд үбэлжэлгэдэ бэлэдхэлэй ажал эршэтэйгээр ябуулна. Үбһэ тэжээл элбэгээр бэлдэжэ, хорой, далаа заһабарилна.

Сэлэнгэ аймаг

Аймагай хүдөө ажахын таһагай дарга Татьяна Владимировна Базаровагай хэлэһээр, хүн бүхэн үхэр малдаа эгээл һайн ногоо сабшажа, үбһэ тэжээл хүсэд бэлдэхэеэ оролдодог ха юм.

Һүүлэй байдалаар Сэлэнгэ аймагта 19 мянга гаран толгой эбэртэ мал, 44-45 мянган толгой хонин, 2 мянга гаран толгой адуун үбэлжэхэ. Тиимэһээ малай тэжээл хүсэд бэлдэгдээ. Үнгэрһэн жэлтэй зэргэсүүлбэл, энэ тоо 10-15 процентээр ехэ юм.

- Нёдондошье бидэ үбһэ хулһа хүсэд бэлдэһэн байнабди. Үбэлнай ехэ саһатай байжа, бэлдэһэн тэжээлээ түгэс хэрэглээбди. Саһанай бэрхэшээлтэй дайралдаһан хүн зон мүнөө бүри ехээр үбһэ бэлдэхэ гэжэ оролдоо. Зарим уһалагдадаг нуга дээрэ хоёр дахин ногоогоо сабшаа, - гэжэ Татьяна Базарова хөөрэнэ.

Сэлэнгын бүхы нютаг һууринуудта үбһэ ногоор һайн ургаагүй. Темник, Сэлэндүүмэ, Ташар болон хэдэн газар энэ ган гасууртай зун болоо.

- Орёо байдалда ороһон ажахынуудтай, хүн зонтой ехэ ажал ябуулаабди. Ондоо нютаг ошожо, тэжээл бэлдэхэ арга олгогдоо. Мүнөө үедэ хэдэн аймагуудһаа үбһэ, тэжээлэй ургамалнуудые худалдан абаха тухай ажал ябуулнабди, - гэжэ Татьяна Владимировна хөөрөөгөө үргэлжэлүүлнэ.

Хори аймаг

Хори аймагта үбһэ ногоон элбэгээр ургажа, аймагай ажахынууд малай тэжээл ехээр бэлдэбэ. Аймагай хүдөө ажахын таһагые даагша Виктор Хабитуевай хэлэһээр, бүхы фермернүүд баяртайнууд, үбэлжэлгэдээ бэлдэжэ байнхай.

- Үбэлнэй ямар байхаб, саһа ехэтэй, һалхи шуургантай, хүйтэн гү - эдэ бүгэдэһөө үбһэ хулһан хүрэхэ гү гэжэ дулдыдаха. Уларил тухай уридшалһан мэдээ харахада, саһа багатай, ехэ һалхигүй үбэл болохоор багсаамжалагдана. Тиимэһээ үбһэ тэжээлнэй хүрэхэ гэжэ һанагдана, - гэжэ Виктор Нимаевич хэлэнэ.

Хориин хүдөө ажахынхиид мүнөө малай хорой, далнуудаа заһабарилна, дулаална.