​Эдир сэтгүүлшэдэй эблэлэй ойн баяр

Америкын Холбоото Штадуудта, Италида, Фран­цида, Финляндида, Германида, Англида, Данида, Хитадта болон Монголдо бэеэ мэдүүлһэн Буряад Уласай Эдир сэтгүүлшэдэй эблэл байгуулагдаһаар 25 жэл гүйсэбэ. Энэ баярта ойдо зорюулагдаһан хэмжээ ябуулгануудай гол үйлэнь Исай Калашниковай нэрэмжэ­тэ номой санда үнгэрөө һэн. Энэ ехэ уулзалга үнгэргөөд, эдир сэтгүүлшэд суута “Артек” ошожо, бэлиг талаангаа гэршэлээд, бусажа ерэбэ.

Бэлигтэй үхибүүдые эблүүлжэ, хурса гуурһатай болгохо эрмэлзэлтэй багша Людмила Будожаповна Доржиева 25 жэлэй саана ураг­шаа һанаатай эдир бэшээшэ­дэй эблэл байгуулаад, мүнөө болотор ударидажа ябана. Түрэл Буряадаа, түрэлхидөө, багшанараа, туһалһан зоноо дээрэ үргэжэ, нэрэ солыень дуудаһан хэды олон хүбүүд, басагад энэ эблэлһээ дали­жан гарааб даа. Олониинь түрэл Улаан-Үдэдөө болон бэшэшье ехэ-ехэ хотонууда­аршье, хари гүрэнүүдтэшье амжалта түгэс ажаллажа ябана. Тэдэнэй дунда нэрлэ­бэл: Чингиз Дагаев – «Юн­кор-орленок-2004», мүнөө “Информ Полис” Хэблэлэй байшанай юрэнхы захирал; Мария Латышева – эдир сэтгүүлшэдэй слёдой лау­реат, “Тивиком” нэгэдэлэй сэтгүүлшэн; Тамара Васи­льева, 2004-2006 онуудай лауреат,“Ариг Ус” нэгэдэлэй сэтгүүлшэн; Валерия Намсараева, Станислав Шобо­горов болон олон даа. Эндэ ганса сэтгүүлшэдые нэрлэ­бэбди. “Эдир сэтгүүлшэдэй эблэлдэ” ябаһан үхибүүд ажахын ямаршье һалбарида хүдэлхэдөө, эрхим амжал­тануудые туйладаг. Юун­дэб гэхэдэ, тэдэнэр ухаагаа гүйлгэжэ, юумэ бүхэниие ушарлажа, уг удхыень олон­до ойлгуулжа үгэдэг шадал­тай болонод ха юм.

Людмила Доржиева Улаан-Үдын Түбэй номой сангай захиралай орлогшо Евгений Жигмитовтэй

Мүнөө эдир сэтгүүлшэд үе сагтаяа жэгдэ алха­лан, медиапродукцинуудые уран хурсаар бүтээжэ һурана. Амжалта альган дээрэ өөрөө ерэшэдэггүй. Үсэд нэтэрүүгээр хүдэлжэ, байгаалиһаа үгтэһэн бэли­гые мүлихэ, бэрхэ багшын ударидалга доро хүгжөөхэ хэрэгтэй.

Эдир сэтгүүлшэд уншаг­шадта, харагшадта, шагнаг­шадта яажа түргөөр, ойл­госотойгоор, һонирхомоор бүтээлнүүдээ хүргэхэб, хүн зоной дурынь татахаб гэжэ һайн һургуули гарана.

Ажабайдалда өөрынгөө харгы бэдэрһэн үхибүүн бүхэн “Эдир бэшээшэдэй эблэлдэ” ябахадаа, арга ша­далаа ойлгожо, али шанараа дээшэлүүлхэбиб, юу хэхэ­дээ амжалта туйлахабиб, ямар туһа хүргэхэбиб, яажа өөрөөшье хүндэтэй болохо­биб гэжэ эртээнһээ ойлгожо абана.

Буряад Уласай Засагай газарай болон Толгойлогшын Захиргаанай хүтэлбэрилэгшын орлогшо Ирина Доржиева амаршална

ЭБЛЭЛ ТУХАЙ

Буряадай “Эдир сэтгүүлшэдэй эблэл” Ородой Хол­боото Улас соогоо эгээл хүгжэнги эмхинүүдэй нэгэн гэжэ дээрэ тоологдодог юм.

- Эдир сэтгүүлшэдэй Бүхэроссиин эблэл 2000 ондо байгуулагдаад, Зүблэлтэ засагай үедэ байһан эблэлнүүдэй заншалнуудые үргэлжэлүүлэн байна. Мүнөө энэ эблэлэй 20 мянган эдиршүүл 3 мянган сэтгүүл, сонинуудые хэблэжэ, сүлжээ холбоонуудта, радио-, теле-, кино-студинуудта, пресс- түбүүдтэ һурана, ажаллана.

Ородой Холбоото Уласай Болбосоролой болон эр­дэм ухаанай, Соёлой яама- нуудтай, Олондо мэдээсэл тараадаг эмхинүүдтэй, «Ар­тек», «Орлёнок» лагерь­нуудтай холбоо барисаа­тайгаар ажалаа ябуулдаг. Эблэлэй түрүүлэгшэ Алек­сандр Школьник Россиин Олониитын телевидениин Зүблэлэй түрүүлэгшэ, Агуу Илалтын музейн захи­рал, багшын эрдэмэй дид- доктор юм, - гэжэ Буряа­дай эдиршүүлэй эблэлэй хүтэлбэрилэгшын орлогшо, эмнэлгын эрдэмэй дид-доктор Жигмит Доржиев хөөрэнэ.

Буряадай эдир сэтгүүлшэд “Залуу Буряад орон” өөрын сонинтой. Сонин зохёохо, эблүүлхэ, хэблүүлхэ гээшэмнай мүнөө сагта хүнгэн бэшэ. Эдир сэтгүүлшэд өөһэдөө зохёоно, гэрэл зурагуудые буулгана, уран гоёор шэмэглэнэ, баһа эблүүлнэ гэхэдэ, хэблүүлхэ гээшэмнай орёо хэрэг ааб даа, мүнгэ санганай талаар. Тиигэбэшье, 25 жэлэйнгээ ойдо үнгэтэ һайхан сонин хэблүүлээ.

49-дэхи һургуулиин Аюна Очирова сониндоо бэшэнэ:

-Людмила Будожаповна багшадамнай поэт Светла­на Нестерова уянгата шүлэг зорюулаа. Тэрээн соо иимэ гоё ирагуу мүрнүүд зэдэлнэ: “Эдир сэтгүүлшэдэй эблэл” элдэбын форумуудые, фестивальнуудые, урилдаануудые эмхидхэдэг. Эдиршүүл зунайнгаа амаралтада “Ар­тек”, “Орлёнок”, Монголой “Найрамдал” болон эндэхи амаралтын лагерьнуудта байхадаа, амаралтаяа аша үрэтэйгөөр үнгэргэнэ.

“Журналистикада яба­хадаа, олоной урда үгэ хүүр хэлэхэдээ, айха эшэхэеэ бо­лёоб. Зугаа хүүрни эмхи гу­римтай болоо. Бэшэхэдээ­шье сэбэрээр, алдуугүйгөөр, эгээл шухалань, һанал бо­долоо тобойлгон гаргажа, олондо ойлгуулжа шадахые һурааб.

Эгээл ехэ амжалтамни гэхэдэ, Чуваш Уласай ниислэл Чебоксары хотодо үнгэрһэн «Волжские встре­чи-29» гэжэ Уласхоорондын эдиршүүлэй фестивалиин I шатын диплом!” – гэжэ Сэлэнгэ аймагай Загастайн дунда һургуулиин Сергей Дашиев бэшэнэ.

«Энэ жэлдэ «Смена» лагерьта амарааб. Тэндэ үхибүүд амарха хоорон­доо «Профи-Смена», «Ли­дер-Смена» и «Арт-Смена» гурбан шэглэлээр ажаллаа. Эдэнэй нэгэндэшье орожо, һуралсал, һорилго гараха ехэ зол гээшэ. Эндэ тамирай олон зүйлнүүдээр бэеэ һорихо, шэнэ һонин аргануудтай танилсан дүршэхэдөө, зоригжохот. Мүн баһа һонирхолтой аяншалганууд эмхидхэгдээ. Оломнай хэдэн зүйлнүүдээр шагнагдаа», - гэжэ 63-дахи һургуулиин Юмжана Базарова бэшээ.

-Энэ зундаа уласхоорон­дын «Найрамдал» лагерьта Монголдо амарааб. Тэндэ олон гүрэнүүдһээ үхибүүд ерэнэ. Тэндэ байхадаа, хүн бүхэн ямар һайн һанаатай, һайхан сэдьхэлтэй гээшэб гэжэ эжэлүүдгүй һанахаш. Үдэр бүхэндэ олон ондоо һонин хэмжээ ябуулганууд үнгэргэгдэжэ, бэе бэетэ­еэ дүтөөр танилсажа, хари гүрэнүүдһээшье олон нүхэдтэй болообди, - гэжэ 56-дахи һургуулиин Анна Урбаева һанамжална.

Айлшад, нүхэд

Түгэсхэлдөө уншагша­даа баярлуулая: Буряа­даймнай эдир сэтгүүлшэд –Бүхэроссиин фестиваль­да илаһан Дари Шагдаро­ва, Цырен Рабдаев, Анна Урбаева болон Арина До­ржиева дүрбэн «Артек» ла­герьта үнгэргэгдэхэ IV Улас­хоорондын медиафорумдо хабаадаа. Тэдэнтэй хамта үшөө хоёр эдир сэтгүүлшэд өөһэдынгөө мүнгэ зөөреэр ябалсажа хабаадахадаа, эр­хим байһанаа харуулаа. Хара ехэ далайн эрьедэ бүхы оронойнгоо үетэнтэй эб хамта хаба шадалаа эрхи­мээр харуулһан эдэ бэрхэ эдиршүүлдээ бүмбэрсэг дэл­хэйн бүхы һайн һайханиие хүсөөд, үшөө үндэр амжалта аята багшынгаа ударидал­гаар туйлажал байгыт даа гэжэ үреэе! 

Николай Гавриловай гэрэл зурагууд