​Үндэһэн хэлэеэ үзэхэ хэрэгтэй

Ородой Холбоото Уласта ажаһуудаг арадуудай түрэл хэлэнүүдые сахин үлөөхэ ба үзэхэ талаар ажал ябуулдаг жаса байгуулха тухай зарлиг доро Россиин Юрэнхылэгшэ Владимир Путин үнгэрһэн долооной эсэстэ гараа табиба. Тус зарлиг гүрэнэй толгойлогшын албан ёһоной сайт дээрэ тунхагладаһан байха юм.

Гүрэнэй тэдхэмжэтэй жаса

“Росси гүрэнэй үндэһэтэнэй үнэтэ хүртөөл ба түүхэ, соёлой угай баялиг болодог Ородой Холбоото Уласай арадуудай түрэл хэлэнүүдые сахин үлөөхэ ба үзэхэ эрхэ байдал зохёохо зорилготойгоор” жаса байгуулха хэрэгтэй гэжэ тус дансада бэшэгдэнхэй.

Москва хотодо ажалаа эрхилхэ жасын эмхидхэн байгуулагшадаар гүрэн түрын Гэгээрэлэй яаман болон үндэһэтэнэй хэрэгүүдэй талаар холбоото уласай агентство хоёр элирхэйлэгдээ. Засагай эдэ зургаанууд гурбан һарын туршада жасын дүрим болон бусад дансануудыень бүтээхээр уялгалагдаа. Харин Засагай газарнай тус жасын хүтэлбэриин болон эбээн тэдхэгшэдэй зүблэлэй бүридэл баталха болоно. Мүн тиихэдэ гүрэнэй зөөри хубаарилагдажа, жасада дамжуулагдаха. Хойто жэлһээ һангай мүнгэ һомологдожо эхилхэнь.

Гүрэнэй бюджедһээ гаргашалагдаһан мүнгөөр, мүн тиихэдэ нигүүлэсхы сэдьхэлэй уряагаар үргэгдэһэн зөөри, хандибаар болон бусад ондоо тээһээ хуулита ёһоор олдоһон мүнгөөр жасын эд зөөри бүридхэгдэхэ гээд хараалагдана.

“Хара хүсөөр хэлэ заажа болохогүй”

Үндэһэн уласуудта шабинар өөһэдынгөө һайн дураар гүрэнэй гэжэ тоологдодог тэндэхи үндэһэн хэлэнүүдые үзэнэ гээшэ гү, али уялгалагдаһан хадаа шудална гү гэжэ шалгалта хэхэ тухай даабари гүрэнэй Юрэнхылэгшэ үшөө нёдондо зун үгэһэн байгаа. Тиихэдээ “хэлэнүүдые үзэхэ гээшэ – Үндэһэн хууляар хараалагдаһан эрхэ мүн. Һайн дуранай эрхэ. Ород хэлэ үзэлгые доошолуулжа болохогүйһөө өөрэгүй, түрэл бэшэ хэлэ хүндэ баалажа үзүүлхэ гээшэ ехэ буруу. Энээндэ нютаг можонуудай хүтэлбэрилэгшэдэй анхарал хандуулнаб”, – гэжэ Владимир Путин хэлээ һэн.

Гүрэнэй толгойлогшын тиигэжэ хэлэһэнэй удаа олон тоото шалгалтанууд нютаг можонудта эмхидхэгдээ, энэ асуудал олониитэ ехэтэ зүбшэн хэлсээ. Байгша оной июлиин 25-да Гүрэнэй Дүүмын һунгамалнууд арадуудай түрэлхи хэлэнүүдые үзэхэ тухай хуулита шиидхэбэри баталан абаһан гээд мэдээжэ. Тиихэдэ һургуулинуудта үндэһэн хэлэнүүдые һайн дураараа үзэхэ бэшэ, харин тэдэниие шэлэжэ һураха тухай нэмэлтэ, хубилалтанууд “Болбосорол” тухай хуулида оруулагдаа. 388 депутат иимэ шиидхэбэриин түлөө дугаа үгөө, харин хоёрхон лэ хүн буруушаагаа бэлэй.

Үндэһэн хэлэнүүдые сахин үлөөхэ талаар совет үедэ бэелүүлгэдэдэг байһан программа гүрэн дотороо һэргээхэ тухай энэ зун Пятигорскдо болоһон залуушуулай болбосоролой хуралдаан дээрэ Владимир Путин хэлэһэн байгаа. Теэд гүрэнэйшье һаа, гансахан жаса хүндүүлхэй энэ асуудал хэр диилэхэб?

Анна Огороднигой гэрэл зураг