​Ахатандаа баяр хүргэнэбди!

Ага тойрогой мэдээжэ ниитэ ажал ябуулагша, бэлигтэй сэтгүүлшэн, ирагуу найрагша Баатар Шагдаровай наһанайнь намтар гайхамшаг юм. Энэ аха нүхэрэймнай бэлиг шадабари дундаршагүй, эрдэм мэдэсэнь дууһашагүй, заха хизааргүй үргэн гэжэ хэлэлтэй.

Дайнай һүүлээрхи шэрүүн үе сагта үндыһэн хүүгэдэй ажабайдалда нилээн хүшэр үйлэ хэрэгүүд дайралдажа, тэдэнэй хүн болохо зам­дань тон һайнаар нүлөөлһэн гээшэ.

Баатар Шагдаров Ага тойрогой Улаан Булаг нютагта түрэһэн гээшэ. Хоёртойхон байхадань, Үрөөнэй нютагта ажаһуудаг Шагдар Бадмаевай бүлэ үргэжэ абаһан юм. Ажалша малша айлай­да хүн болоходоо, балшар багаһаа хара ажалай амта үзэһэн, тэрэнь саашадаа ямаршье ажал хэ­хэдэнь ехэ туһатай байгаа. Дунда һургуулияа дүүргээд, Новосибирскын электротехническэ дэ­эдэ һургуулида ороһон юм. Тэндээ 3-дахи курсда һуража байхадаа, Томскын политехническэ дээдэ һургуулиин “атомна электростанциин” таһагта ороһон байна. Тэрэнээ дүүргээд, сэрэгэй албан­да татагдахадаа, “Страж России” гэһэн сэрэгэй хэблэлдэ гэрэл зурагай сэтгүүлшэнээр ажаллаа. Тэндэһээ табигдаад, Үбэр Байгалай хизаар руу ерэхэдээ, аймагай “Знамя коммунизма” гэһэн сониндо хүдэлһэн байна. Тэрэ үедэ Москва хотодо ординатура дүүргэжэ байһан наһанайнгаа нүхэр Цыцыгма Цыренжаповадаа ошожо, Горькиин нэрэмжэтэ литературна дээдэ һургуулида һуража эхилһэн юм. Тэндэ һуража байха үедөө “Охота и охотничье хозяйство” гэһэн сэтгүүлдэ ажаллаа. Эндэһээл Баатар Шагдаровай агнуури болон ойн ажахы, Эхэ байгаали аршалха эхин мүндэлөөл хаш.

Иимэ һонин шэглэлнүүдээр һонирхожо, эрдэм мэдэсэеэ баяжуулжа байбашье, буряад хэлэндээ ходол сэдьхэлээрээ түшэглэн ябаа бшуу. Ага нютагаа бусахадаа, “Агын үнэн” сониндо ажаллаха үедөө, тэрэ үеын аха захатан сэтгүүлшэд буряад хэлэтэ сонин байгуулһан ехэ габьяатай бшуу. Тэдэнэй нэгэн Баатар Шагдаров болоно. 1989 ондо “Толон” сонин мүндэлһэн юм. Тэрээндэ Баатар Бадмаевич “Бүгэдэ Буряадай үндэһэн хэблэл” гэжэ тодо нэрэ олгуулһан. 27 жэлэй туршада Жа­мьян Балданжабоной нэрэмжэтэ уран зохёолой нэгэдэлые мүнөө болотороо хүтэлбэрилнэ. Энэл үедэ Бүгэдэ Буряадай соёл хүгжөөлгын эблэл байгуулалсаһан юм.

Наһанайнгаа амаралтада гараад, сааша­даа үшөө табан жэл Ага аймагай ангуушадай ба загаһа баригшадай эблэлые хүтэлбэрилөө. “Агын агнууриин” ажахын байгуулагдахадань, Баатар Бадмаевич ахамад егерь боложо ажаллаа. Мүнөөшье болотороо “Ой модые авиациин ар­гаар хинан шалгадаг түбэй” диспетчерээр Агын ойн ажахыда ажаллаһан зандаа.

Тамир, техникэ, зайн гал, атомна элшэ хүсэн, сэрэгэй албан, агнуури болон ойн ажахы, уран зохёолшо – эдэ бүгэдэ хэдэн янзын шэглэлнүүдые элсүүлэн, нягта тэг­шээр амжалтатай ябуулжа байгаа хадаа, мүнөө үшөө нэгэ шэнэ оньһото мэргэжэл шудалжал байгаа ёһотойт, эрхим хүндэтэ Баатар Бадмаевич! Аха захатан, дээдын га­рай гуурһанай аха нүхэрөө 70 наһанайнь ойн баяраар амаршалжа, үшөө олон жэл­дэ гайхамшаг уран бүтээлнүүдээрээ арад зоноо баясуулан байхал бэзэт гэжэ найда­набди.

«Буряад үнэн» сониной редакци