832
Ноябриин 4-дэ Улаан-Үдын Соведүүдэй талмайда Арадай нэгэдэлгын үдэртэ зорюулһан хэмжээ ябуулганууд эмхидхэгдэхэ. Баярай хэмжээ ябуулгада ажалай коллективүүд, олониитын болон залуушуулай эмхинүүд, ветеранууд, тамиршад, оюутад, һурагшад хабаадаха. Валико Гаспарян, Сергей Плотников, Ирина Шагдурова, «Лаккитон» бүлгэм, хатарай «Энжелс», «Цветики» гэһэн жэшээтэ ансамбльнууд һайндэр шэмэглэхэ.
Тиихэдэ «Манай хүсэн - нэгэдэлгэ» гэһэн флеш-моб эмхидхэгдэхэ юм. Хэмжээ ябуулгада Буряад Уласай түб талмайда Ород гүрэнэй хэмжээн, шэгнүүрээрээ ехэ туг намилзуулагдаха.
Ноябриин 4-дэ Буряад драмын театрта Арадай нэгэдэлгын үдэртэ зорюулагдаһан « Россия объединяет » гэһэн һайндэрэй тоглолто үнгэргэгдэхэ. Энэл үдэр «Соёл, уралигай һүни» гэһэн соёлой-болбосоролой программын хэмжээндэ хотын музейнүүд, театрнууд, номой сангуудта мастер-классууд, уулзалга, мүрысөөнүүд эмхидхэгдэхэ.
Ц.С. Сампиловай нэрэмжэтэ музейдэ нэгэдэмэл талмай байгуулагдажа, үдэшын 18-һаа 23 саг болотор Буряадай түүхын, байгаалин музейнүүд, оперо болон баледэй, «Үльгэр» театрнууд программануудые бэлдэхэ.
Буряад Уласай Үндэһэтэнэй номой санда «Артотека: для любителей искусства», «Арт-окно» гэһэн хэмжээ ябуулганууд, «Оглянись на красоту» гэһэн номой үзэсхэлэн дэлгэгдэхэ.
Ноябриин 3-4-нэй үдэрнүүдтэ Буряад драмын театрай тайзан дээрэ «Байгал» театрай бүжэгшэд СНГ болон Ород гүрэнэй арадуудай дуу, хатар гүйсэдхэхэ.
Баярай хэмжээ ябуулганууд Буряад уласай бүхы аймагууд болон Улаан-Үдэдэ эмхидхэгдэхэ. Ноябриин 4-дэ ниислэл хотын паркнуудта олон тоото хэмжээ ябуулганууд үнгэрхэ юм.
Буряад Уласай Засагай газарай мэдээсэлэй албанай гэрэл зураг
