798
Ородой Холбоото Уласай Юрэнхылэгшын Захиргаанай хүтэлбэрилэгшын нэгэдэхи орлогшо Сергея Кириенкын хүтэлбэри доро эрхэтэдэй олоониитэ хүгжөөхэ Юрэнхылэгшын грантнуудта хүртэхэ мүрысөөнэй дүнгүүдые согсолхо талаар Залан хүтэлбэрилгын суглаан Москва хотодо октябриин 31-дэ үнгэргэгдэбэ. 2018 оной Юрэнхылэгшын грантда хүртэхэ мүрысөөнэй хоёрдохи шатын дүнгүүд согсологдоо.
Буряад уласай коммерческэ бэшэ 72 эмхи мүрысөөнэй хоёрдохи шатада хабаадаха тухай мэдүүлгэ оруулһан байна. Тэдэнэй 16-ниинь илагшадай тоодо орожо, 40 сая түхэригһөө дээшэ грантда хүртэхэ юм. Тиихэдэ грантын доодо хэмжээн – 354 мянган түхэриг, дээдэ хэмжээнэй грант 7,411 сая түхэриг юм.
2018 оной мүрысөөнэй хоёр шатын мүрысөөнэй дүнгүүдээр, Ородой Холбоото Уласай Юрэнхылэгшын грантын жаса Буряад Уласай 28 эмхи дэмжэбэ. Грантын хэмжээн 62,346 саяһаа дээшэ түхэриг юм.
Илагшадай тоодо Татьяна Черных гэгшын «Творчеству в малых селах – быть!» гэһэн түсэл ороһон байна. Буряад Уласай 128 бага нютагуудта ажаһуудаг үхибүүдэй зохёохы бэлиг талаан хүгжөөхэ оршон байгуулха түсэл бэелүүлгэдэ Татьяна Черных 5,5 сая түхэригтэ хүртэбэ. Уласай олониитын «Здоровье Бурятии» гэһэн жаса илагшадай тоодо ороо. Тиихэдэ Ивалгын дасанай музей байгуулха гэһэн түсэл баһал грантда хүртэбэ.
Тэрэшэлэн, Байгал далай шадар оршодог аймагуудта ойн, торфын түймэрнүүдые һэргылхэ, унтарааха, шалгаха талаар түсэл илагшадай тоодо оробо. Баледэй хатаршадай Ород-япон-евразиин мүрысөөн эмхидхэхэ түсэл, Ородой Холбоото Улас дотор «Сибирская творческая мастерская военно-исторических фильмов» анха түрүүшын эмхи гэһэн түсэл дэмжэлгэдэ хүртөө.
Буряад уласай коммерческэ бэшэ эмхинүүдэй түлөөлэгшэдтэ 2018 оной февраль һарада һуралсалай семинарнууд эмхидхэгдээ. Буряад Уласай Толгойлогшо Алексей Цыденовэй урилгаар Юрэнхылэгшын грантнуудай жасын гүйсэдхэхы захирал Антон Долгов, юрэнхы захиралай орлогшо Иннокентий Дементьев хэшээлнүүдые үнгэргөө.
2017 ондо уласай коммерческэ бэшэ 25 эмхи 46,869 сая түхэригэй Юрэнхылэгшын грантда хүртэһэн байна.
Буряад Уласай Засагай газарай мэдээсэлэй албанай гэрэл зураг
